DINAMANI : Daily International and NAtional Media Aggregator for News and Information

Tamil Newspaper Articles for TNPSC Exams - Current Affairs - 01-09-2022

 

பிரதான் மந்திரி ஜன் தன் யோஜனா வங்கி கணக்கு வைத்திருப்பவர்கள் ஜீரோ பேலன்ஸ் இருந்தாலும் ரூ.10,000 வரை எடுக்கலாம், எப்படி என்பது இங்கே செய்தியில் பார்ப்போம்.

நாட்டு மக்கள் அனைவருக்கும் வங்கிச் சேவைகள் கிடைக்க வேண்டும் என்பதற்காக, 2014 ஆம் ஆண்டின் ஆகஸ்ட் மாதம் 15 ஆம் தேதி பிரதமர் நரேந்திர மோடி  தனது சுதந்திர நாள் உரையில் ஜன் தன் ஜோஜனா திட்டத்தை அறிமுகம் செய்தார். 

மேலும், ஏழை எளிய மக்கள் பணம் அனுப்புதல், கடன், காப்பீடு மற்றும் ஓய்வூதியம் போன்ற நிதிச் சேவைகளுக்கு தனிநபர்கள் வங்கிச் சேவைக்குள் இணைக்க வேண்டும் என்ற நோக்கத்தில் ஆகஸ்ட் 28  தொடங்கப்பட்டு வெற்றிகரமாகச் செயல்படுத்தப்பட்டு வருகிறது.

சலுகைகள்: ஜன் தன் யோஜனா திட்டத்தில் நிறைய வசதிகளும் சலுகைகளும் உள்ளன. அதில் முக்கியமான ஒரு வசதிதான் ஓவர் டிராஃப்ட். இதன் சிறப்பம்சம் என்னவென்றால் உங்களுடைய ஜன் தன் யோஜனா கணக்குகளை வைத்திருப்பவர்கள் கணக்கில் பணமே இல்லாவிட்டாலும் (ஜீரோ பேலன்ஸ்) கூட நீங்கள் ரூ.10,000 வரை எடுக்க முடியும். கணக்கில் பணம் இருந்தாலும் இதை நீங்கள் எடுக்கலாம்.

இந்த திட்டம் அறிமுகம் செய்யப்பட்ட சமயத்தில் ஓவர் டிராஃப்ட் முறையில் ரூ.5000 மட்டுமே எடுக்க முடியும்.

இதன் பின்னர் அது இரட்டிப்பாக்கப்பட்டு தற்போது ரூ.10,000 வரை எடுக்கும் வசதி ஏற்படுத்தப்பட்டது. ரூ.2000 வரை மட்டுமே நிபந்தனை இல்லாமல் எடுக்க முடியும். ஓவர் டிராஃப்ட் வசதியைப் பயன்படுத்த குறைந்தது 6 மாதங்கள் ஜன் தன் கணக்கை பயன்படுத்தியிருக்க வேண்டும்.

அப்போதுதான் ரூ.10,000 எடுக்க முடியும். இல்லாவிட்டால் ரூ.2000 மட்டுமே எடுக்க முடியும். ஓவர் டிராஃப்ட் வசதியைப் பெறுவதற்கான வயது வரம்பு 60ல் இருந்து 65 ஆக உயர்த்தப்பட்டுள்ளது.

ஜன் தன் யோஜனா கணக்குகள் நேரடி பலன் பரிமாற்றம், பிரதான் மந்திரி ஜீவன் ஜோதி பீமா யோஜனா, பிரதான் மந்திரி சுரக்ஷா பீமா யோஜனா, அடல் பென்ஷன் யோஜனா, மைக்ரோ யூனிட்ஸ் டெவலப்மென்ட் மற்றும் ரிஃபைனான்ஸ் ஏஜென்சி வங்கி திட்டத்திற்குத் தகுதியுடையவை.



Read in source website

 

அனைத்து வகை கல்லூரி மற்றும் பல்கலைக்கழகங்களில் இளங்கலை பட்டப்படிப்புகளில் 2-ஆவது செமஸ்டர் தேர்வில் தமிழ் மொழி பாடம் கட்டாயம் என உயர்கல்வித்துறை உத்தரவிட்டுள்ளது. இதனால் பிளஸ் 2 வகுப்புகளில் உருது, பிரெஞ்சு படித்த மாணவர்கள், தமிழ் கற்க வேண்டிய கட்டாயமாகிறது. 

தாய் மொழியான தமிழ் மொழியினை மாணவர்கள் அனைவரும் கற்க வேண்டும் எனவும், தாய் மொழியில் கல்வி கற்பதை ஊக்குவிக்க வேண்டும் எனவும் தமிழ்நாடு அரசு மாணவர்களை ஊக்குவித்து வருகிறது.

புகார்: ஆனால், சில கல்லூரிகள், பல்கலைக்கழகங்கள் தமிழ் மொழி பாடத்தை நடத்தவில்லை என தகவல்கள் வெளியானதை அடுத்து அனைத்து பல்கலைக்கழகங்கள் மற்றும் கல்லூரிகளின் இளங்கலை பட்டப்படிப்புகளில் தமிழ் மொழி கட்டாயம் என உயர்கல்வித்துறை செயலாளர் கார்த்திகேயன் அதிரடி உத்தரவு ஒன்றை பிறப்பித்துள்ளார்.

இதுதொடர்பாக உயர்கல்வித்துறை விடுத்துள்ள உத்தரவில், அனைத்து பல்கலைக்கழகங்களிலும் இளங்கலை பட்டப்படிப்புகளில் 2 ஆவது செமஸ்டர் தேர்வில் தமிழ் மொழி பாடம் கட்டாயம். 

விலக்கு: சென்னை அண்ணா பல்கலைக்கழகம் மற்றும் தமிழ்நாடு ஆசிரியர் கல்வியியல் பல்கலைக்கழகங்கள் தவிர மற்ற அனைத்து கல்லூரிகள், பல்கலைக்கழகங்களில் தமிழ் மொழி பாடத்திற்கான தேர்வுகளை நடத்த வேண்டும் என உத்தரவிட்டுள்ளது.

அனைத்து வகை கல்லூரி, பல்கலைக்கழகங்களில் 2-ஆம் ஆண்டு செமஸ்டர் தேர்வில் தமிழ்மொழி தேர்வு கட்டாயம் இடம்பெற வேண்டும். அதற்காக தமிழ் மொழி பாடத்திட்டங்களை சரிவர பல்கலைக்கழகங்கள் தேர்வு செய்து முறைப்படுத்தி தமிழ் தேர்வுகளை நடத்த வேண்டும்.

சில கல்லூரிகள் மற்றும் பல்கலைக்கழகங்கள் தமிழ் மொழி பாடத்தை நடத்தவில்லை என்று வந்துள்ள தகவலை அடுத்து உயர்கல்வித்துறை செயலாளர் கார்த்திகேயன் அனைத்து பல்கலைக்கழகங்கள் கல்லூரிகளுக்கு உத்தரவு பிறப்பித்துள்ளார்.



Read in source website

காவல்துறை வாகனங்களில் உச்சவரம்பை தாண்டி எரிபொருளை பயன்படுத்தினால், ஊதியத்தில் பிடித்தம் செய்யப்படும் என போலீஸாருக்கு அறிவுறுத்தப்பட்டுள்ளது.

இது குறித்த விவரம்:

நாட்டின் ஐந்தாவது பெரிய காவல்துறையான, தமிழக காவல்துறையில் 1.05 லட்சம் போலீஸாா் உள்பட 1.13 லட்சம் போ் பணிபுரிகின்றனா். மாநிலம் முழுவதும் 198 அனைத்து மகளிா் காவல் நிலையங்கள் உள்பட 1,500 காவல் நிலையங்கள் செயல்படுகின்றன.

தற்போதுள்ள மக்கள் தொகையின்படி 632 பேருக்கு ஒரு காவலா் என்ற அடிப்படையில் காவலா்கள் இருப்பதாக புள்ளி விவரங்கள் தெரிவிக்கின்றன. சட்டம் மற்றும் ஒழுங்குப் பிரிவு உள்பட 16 பிரிவுகள் இயங்குகின்றன. இதில் காவல்துறை வாகனங்களை பராமரிப்பதற்கு என்று தனியாக ஒரு பிரிவும் உள்ளது.

இந்த பிரிவு தமிழக காவல்துறையின் தலைமையிட ஏடிஜிபியின் கீழ் செயல்படுகிறது. இந்த பிரிவின் ஏடிஜிபியான ஜி.வெங்கட்ராமன் தமிழக காவல்துறை அதிகாரிகள்,மாநகர காவல் ஆணையா்கள்,மாவட்ட காவல் கண்காணிப்பாளா்கள் உள்ளிட்டோருக்கு ஒரு சுற்றறிக்கையை இரு நாள்களுக்கு முன்பு அனுப்பியுள்ளாா்.

ஊதியத்தில் பிடித்தம்:

அதில் கூறப்பட்டிருப்பதாவது:

எரிபொருள் சிக்கனத்தை கடைபிடிக்கும்படி மத்திய, மாநில அரசுகள் வலியுறுத்தி வருகின்றன. காவல்துறை வாகனங்களில் அரசு நிா்ணயம் செய்துள்ள அளவைவிட அதிக எரிபொருள் பயன்படுத்தினால், அதிகமாக பயன்படுத்தப்பட்ட எரி பொருளுக்கு சம்பந்தப்பட்ட வாகனத்தை பயன்படுத்தும் அலுவலரிடமிருந்து பணம் பிடித்தம் செய்ய அரசாணை வெளியிடப்பட்டுள்ளது.

எனவே காவல்துறை வாகனங்களுக்கு எரி பொருள் நிா்ணயிக்கப்பட்டுள்ள உச்ச வரம்புக்கு மேல் செல்லாமல், திட்டமிட்டு எரிபொருளை சிக்கனமாக பயன்படுத்தும்படி கேட்டுக் கொள்ளப்படுகிறது.

நிா்ணயிக்கப்பட்ட உச்ச வரம்பை விட, கூடுதலாக எரி பொருள் பயன்படுத்தக் கூடாது. கூடுதல் எரி பொருள் பயன்படுத்தினால் சம்பந்தப்பட்ட அதிகாரியின் ஊதியத்தில் இருந்து பிடித்தம் செய்து, அரசு கணக்கில் செலுத்தப்பட வேண்டும் என்று அரசாணை கூறுகிறது. எனவே அனைத்து அதிகாரிகளும் எரிபொருள் சிக்கனத்தை கடுமையாக பின்பற்றுமாறு அறிவுறுத்தப்படுகிறாா்கள் என்று அதில் குறிப்பிடப்பட்டுள்ளது.



Read in source website

அரசுக்கு எதிராக குற்றம் சாட்டப்பட்டு அதிக அளவில் கைதானவர்களில் அசாம் மாநிலம் முதலிடத்தில் உள்ளதாக என்சிஆர்பி அறிக்கையில் தெரிவிக்கப்பட்டுள்ளது.

இந்த அறிக்கை வெளியான பிறகு எதிர்க்கட்சிகள் அசாமில் ஆளும் பாஜக அரசை கடுமையாகத் தாக்கிப் பேசியுள்ளனர். அசாமில் ஆளும் பாஜக அரசு கடுமையான சட்டங்களைப் பயன்படுத்தி அரசுக்கு எதிராக பேசுபவர்களை காவல் துறை உதவியுடன் கைது செய்து வருகிறது. 

என்சிஆர்பி அறிக்கையின்படி, அசாமில் இந்த ஆண்டு அரசுக்கு எதிராக பேசியவர்கள் என 35 பேர் கைது செய்யப்பட்டுள்ளனர். கடந்த ஆண்டு கைது செய்யப்பட்டவர்களின் எண்ணிக்கை 36 ஆக இருந்தது. ஐந்து தண்டனைச் சட்டங்களின் கீழ் அரசுக்கு எதிரான கருத்தை தெரிவிப்பவர்கள் கைது செய்யப்படுகிறார்கள் என அறிக்கையில் தெரிவிக்கப்பட்டுள்ளது. 124A, 121, 121A,122 மற்றும் 123 ஆகிய பிரிவுகளின் கீழ் அரசுக்கு எதிராக பேசிய அனைவரும் கைது செய்யப்பட்டுள்ளனர்.


அரசுக்கு எதிராக கருத்து தெரிவிப்பவர்களை கைது செய்வதில் அசாமைத் தொடர்ந்து ஆந்திரம் ( 30 பேர்), ஜம்மு-காஷ்மீர் (13 பேர்) மற்றும் மணிப்பூர் (10 பேர்) அடுத்தடுத்த இடங்களில் உள்ளன. இந்த மாநிலங்களைத் தவிர மற்ற மாநிலங்களில் கைது செய்யப்படுபவர்களின் எண்ணிக்கை ஒற்றை இலக்கத்தியே உள்ளது.

இது குறித்து அசாமின் எதிர்க்கட்சித் தலைவர் தேபபிரதா சாய்கியா கூறியதாவது: “ மாநிலத்தில் பல உதாரணங்களைக் கூறலாம். சிறிய குற்றங்களுக்காக பாஜக அரசு கடுமையான சட்டங்களைப் பயன்படுத்தி பலரைக் கைது செய்துள்ளது. அசாம் அரசு உச்ச நீதிமன்றத்தின் வழிகாட்டுதலைப் பின்பற்றவில்லை. காவல் துறையைப் பயன்படுத்தி பாஜக அரசு மக்களை தேவையில்லாமல் அச்சுறுத்தி வருகிறது. சில நேரங்களில் காவல் துறை டிஜிபியின் சில தேவையற்ற கருத்துகளையும் மாநிலத்தில் பார்க்க முடிகிறது.” என்றார்.



Read in source website

 

பல்கலைக்கழக துணைவேந்தர்களை நேரடியாக ஆளுநரே தேர்ந்தெடுக்கும் அதிகாரத்தைப் குறைப்பதற்கான மசோதா நிறைவேற்றம்.

கேரளத்தில் பல்கலைக்கழக துணைவேந்தர்களை நியமிக்கும் அதிகாரம் முழுமையாக ஆளுநரிடமே இருந்து வந்த நிலையில், இனி மாநில அரசிடம் ஆலோசிக்காமல் துணைவேந்தர் நியமனம் நடைபெறக்கூடாது என்கிற புதிய மசோதாவை முதல்வர் பினராயி விஜயன் தலைமையிலான அமைச்சரவை அம்மாநில சட்டபேரவையில் இன்று தாக்கல் செய்தது.

இதற்கு எதிர்ப்பு தெரிவித்து, காங்கிரஸ் எம்.எல்.ஏ.க்கள்  வெளிநடப்பு செய்தனர்.



Read in source website

இந்திய விமானப் படை பயன்படுத்தும் சினூக் ஹெலிகாப்டர்கள் நல்ல நிலையில் இருப்பதாகவும் எந்த பிரச்னையும் இல்லை என்றும் தயாரிப்பு நிறுவனமான போயிங்கின் இந்திய அதிகாரி தெரிவித்துள்ளார்.

1960களில் இருந்தே அமெரிக்க ராணுவத்தில் பயன்படுத்தப்பட்டு வரும் சினூக் என்ற வகை ஹெலிகாப்டரில் சமீபமாக அடிக்கடி என்ஜின் தீப்பிடித்த புகார் வந்ததையடுத்து அதன் பயன்பாட்டுக்கு தடை விதித்து அமெரிக்கா உத்தரவிட்டது. தற்போது அமெரிக்காவிடம் 400 சினூக் ஹெலிகாப்டர்கள் உள்ளன.

இந்தியாவிலும் கடந்த 2019 மார்ச் மாதம் முதல் சினூக் ஹெலிகாப்டர்கள் ராணுவத்தில் முக்கியப் பயன்பாட்டில் உள்ளன. இந்தியாவிடம் தற்போது 15 சிஎச்-47 சினூக் ஹெலிகாப்டர்கள் உள்ளன

மேலும், சினூக் ஹெலிகாப்டர்களுக்கு அமெரிக்க ராணுவம் தடை விதித்ததையடுத்து அதைத் தயாரித்த போயிங் நிறுவனத்திடம் இந்திய விமானப்படை விளக்கம் கேட்டுள்ளது. 

இந்நிலையில் 'ஏஎன்ஐ' செய்தி நிறுவனத்திற்கு பேட்டியளித்த போயிங் நிறுவனத்தின் இந்திய தலைமை அதிகாரி சலில் குப்தே, 'இந்தியாவில் பயன்பாட்டில் உள்ள சினூக் ஹெலிகாப்டர்கள் நல்ல நிலையில் உள்ளன. எந்த பிரச்சனையும் இல்லை. மேலும், இந்தியப் படைகளால் இயக்கப்படும் ஹெலிகாப்டரில் இதுவரை எந்தப் பாதிப்பும் இல்லை. அவை செயல்பாட்டில் உள்ளன' என்று தெரிவித்துள்ளார். 

மேலும், இதுகுறித்து அரசு அதிகாரிகள், 'அமெரிக்க ராணுவத்தின் சினூக் சிஎச்-47 ஹெலிகாப்டர்கள் நிறுத்தப்பட்டதற்கான காரணங்களை இந்தியா அமெரிக்காவிடம் கேட்டுள்ளது. இந்திய விமானப்படையின் சினூக் ஹெலிகாப்டர் இன்னும் செயல்பாட்டில் உள்ளது' என்று தெரிவித்துள்ளனர். 



Read in source website


தில்லி சட்டப்பேரவையில் நடைபெற்ற நம்பிக்கை வாக்கெடுப்பில் முதல்வா் அரவிந்த் கேஜரிவால் வெற்றி பெற்றார்.

தில்லி ஆளுநரை பதவி விலக வலியுறுத்தி ஆம் ஆத்மி எம்எல்ஏக்களும், மதுவிலக்கு கொள்கை மூலம் ஊழல் செய்ததாகக் கூறப்படும் புகாரில் சிக்கியிருக்கும் துணை முதல்வர் மணீஷ் சிசோடியா பதவி விலகக் கோரி பாஜக எம்எல்ஏக்கள் தில்லி சட்டப்பேரவையில் விடிய விடிய போட்டி போராட்டம் நடத்தியிருந்த நிலையில், கேஜரிவால் நம்பிக்கை வாக்கெடுப்பு கோரி பேரவையில் தாக்கல் செய்திருந்தார்.

இந்நிலையில், இன்று தில்லி சட்டப்பேரவையில் நம்பிக்கை வாக்கெடுப்பு நடத்தப்பட்டது. இதில், 58 வாக்குகள் பெற்று கேஜரிவால் வெற்றி பெற்றார்.

70 உறுப்பினா்களைக் கொண்ட தில்லி சட்டப்பேரவையில் ஆம் ஆத்மிக்கு 62 எம்எல்ஏக்களும், பாஜகவுக்கு 8 எம்எல்ஏக்களும் உள்ளனா். இன்றைய வாக்கெடுப்பில் ஆம் ஆத்மி கட்சியை சேர்ந்த 58 எம்.எல்.ஏ.க்கள் பங்கேற்றனர்.

மீதமுள்ள நான்கு பேரில், பேரவைத் தலைவர் கனடாவில் உள்ளதால், துணை பேரவைத் தலைவர் அவை நடவடிக்கைகளை மேற்கொண்டார். மீதமுள்ல இருவரில், எம்.எல்.ஏ. நரேஷ் பல்யான் ஆஸ்திரேலியாவிலும், சத்யேந்திர ஜெயின் சிறையிலும் உள்ளதால் வாக்கெடுப்பில் பங்கேற்கவில்லை.

அப்போது முதல்வர் கேஜரிவால் பேசியதாவது:

“துணை முதல்வர் மணீஷ் சிசோடியா மீது பொய் வழக்கு பதியப்பட்டுள்ளது. அவரது வீடு, வங்கி கணக்குகளில் சோதனை செய்த சிபிஐ எதையும் கைப்பற்றவில்லை.

சிசோடியா மீது சிபிஐ வழக்கு பதிவு செய்வதற்கு முன்பாக, குஜராத் தேர்தலில் ஆம் ஆத்மியின் வாக்கு சதவிகிதம் 4ஆக இருந்தது. ஆனால், தற்போது 6-ஆக அதிகரித்துள்ளது. கைது செய்யப்பட்டால் மேலும் அதிகரிக்கும் என்று நினைக்கிறேன்.

எனது இரண்டு குழந்தைகளும் ஐஐடியில் படித்தார்கள். அதேபோல், நாட்டின் அனைத்து குழந்தைகளுக்கு கல்வி கிடைக்க வேண்டும் என்று நினைக்கிறேன்” என்றார்.

 



Read in source website

 

பிரபல சமூக சேவகர் மேரி ராய் உடல்நலக் குறைவால் இன்று காலமானதாக அவரது குடும்ப வட்டாரங்கள் தெரிவித்தன. 

அவருக்கு வயது 89. சிரியன் கிறிஸ்துவப் பெண்களுக்கு, அவர்களின் மூதாதையர் சொத்தில் சம உரிமை கிடைக்க சட்டப்பூர்வமாக போராடியவர் மேரி ராய். 

இவர், பிரபல எழுத்தாளரும், கல்வியாளரும் ஆவார். மேன் புக்கர் பரிசு வென்ற அருந்ததி ராயின் தாயார் ராய் புகழ்பெற்ற பள்ளி ஒன்றையும் நிறுவியுள்ளார். 

அவரது இறுதிச் சடங்கு வெள்ளிக்கிழமை காலை 11 மணியளவில் கோட்டயத்தில் நடைபெற உள்ளது. பள்ளிகூடா அருகே உள்ள அவரது இல்லத்தில் இறுதிச் சடங்கு நடைபெறுகிறது. 

அவரது உடல் வியாழக்கிழமை மாலை 3 மணி முதல் வெள்ளிக்கிழமை காலை 10 மணி வரை பொதுமக்கள் அஞ்சலிக்காக வைக்கப்படுகிறது. 



Read in source website

ஐக்கிய அரபு அமீரகத்துக்கு 3 நாள் அரசுமுறை பயணமாக புதன்கிழமை வந்த இந்திய வெளியுறவுத் துறை அமைச்சா் எஸ்.ஜெய்சங்கா், அபுதாபியில் கட்டப்பட்டு வரும் முதல் ஹிந்து கோயிலின் பணிகளைப் பாா்வையிட்டாா்.

இதுதொடா்பாக, ஐக்கிய அரபு அமீரகத்திலுள்ள இந்திய தூதரகம் ட்விட்டரில் வெளியிட்ட பதிவில் கூறப்பட்டுள்ளதாவது: வெளியுறவு அமைச்சா் எஸ்.ஜெய்சங்கரின் ஐக்கிய அரபு அமீரக சுற்றுப்பயணத்துக்கு மங்களகரமான தொடக்கம் அமைந்துள்ளது. அபுதாபியில் சுவாமி நாராயணன் கோயில் கட்டுமானப் பணிகளை அவா் பாா்வையிட்டாா். கோயில் கட்டுவதற்காக இந்தியா்கள் மேற்கொண்ட முயற்சிகளை பாராட்டிய அவா், அமைதி, சகிப்புத்தன்மை மற்றும் நல்லிணக்கத்தின் அடையாளமாக இக்கோயில் திகழும் எமன குறிப்பிட்டதாக இந்திய தூதரகம் தெரிவித்துள்ளது.

சுமாா் 55,000 சதுர மீட்டா் நிலத்தில் அமையவிருக்கும் ஹிந்து கோயிலில், இந்திய சிற்பக் கலைஞா்கள் மூலம் கல் வேலைப்பாடுகள் நடைபெறவுள்ளன.

தனது இந்தப் பயணத்தின்போது, ஐக்கிய அரபு அமீரகத்தின் வெளியுறவு அமைச்சா் ஷேக் அப்துல்லா பின் சையதுடன் இருதரப்பு உறவுகள் குறித்து ஜெய்சங்கா் பேச்சுவாா்த்தை நடத்தவுள்ளாா்.



Read in source website

இதர பிற்படுத்தப்பட்ட வகுப்பை (ஓபிசி) சோ்ந்த 18 சமூகத்தினரை பட்டியலினத்தவா் (எஸ்.சி) பிரிவில் சோ்த்து உத்தர பிரதேச அரசு வெளியிட்ட அறிவிக்கையை அந்த மாநில உயா்நீதிமன்றம் புதன்கிழமை ரத்து செய்தது.

கடந்த 2016-ஆம் ஆண்டு உத்தர பிரதேசத்தில் அகிலேஷ் யாதவ் தலைமையிலான சமாஜவாதி அரசு ஆட்சியில் இருந்தபோது மஜ்வாா், கஷ்யப், மல்லா உள்ளிட்ட ஓபிசி வகுப்பைச் சோ்ந்த 18 சமூகத்தினா் பட்டியலினத்தவா் பிரிவில் சோ்க்கப்பட்டனா். எனினும் அந்த சமூகத்தினருக்கு பட்டியலினத்தவா் சான்றிதழ்கள் வழங்க அந்த மாநில உயா்நீதிமன்றம் 2017-ஆம் ஆண்டு தடை விதித்தது.

இதைத் தொடா்ந்து, 18 சமூகத்தினரையும் பட்டியலினத்தவா்களாக அடையாளப்படுத்தும் மற்றோா் அறிவிக்கையை 2019-ஆம் ஆண்டு யோகி ஆதித்யநாத் தலைமையிலான பாஜக அரசு வெளியிட்டது. அந்த நடவடிக்கைக்கும் மாநில உயா்நீதிமன்றம் தடை விதித்தது.

இந்நிலையில், இந்த விவகாரம் தொடா்பாக 2016, 2019-ஆம் ஆண்டுகளில் வெளியிடப்பட்ட அறிவிக்கைகளுக்கு எதிராக மாநில உயா்நீதிமன்றத்தில் பல்வேறு தரப்பினா் பொதுநல மனு தாக்கல் செய்தனா்.

அந்த மனுக்கள் உயா்நீதிமன்றத் தலைமை நீதிபதி ராஜேஷ் பிண்டல், ஜே.ஜே.முனீா் ஆகியோா் அடங்கிய முன்பாக புதன்கிழமை விசாரணைக்கு வந்தது. அப்போது நீதிபதிகள் கூறுகையில், ‘பட்டியலினத்தவா் பிரிவில் மாற்றங்களை மேற்கொள்ளும் அதிகாரம் மாநில அரசுக்கு இல்லை. எனவே, ஓபிசி வகுப்பைச் சோ்ந்த 18 சமூகத்தினரை பட்டியலினத்தவா் பிரிவில் சோ்த்து உத்தர பிரதேச அரசு வெளியிட்ட அறிவிக்கைகள் ரத்து செய்யப்படுகின்றன’ என்று தீா்ப்பளித்தனா்.



Read in source website

மாநிலங்களுக்கு 15 லட்சம் டன் கொண்டைக் கடலையை கிலோ ரூ.8-க்கு அளிக்க மத்திய அமைச்சரவை ஒப்புதல் அளித்துள்ளது.

முதலில் கேட்கும் மாநிலங்களுக்கு இந்தத் திட்டத்தின்கீழ் கொண்டைக் கடலையை ஒதுக்க முடிவு செய்யப்பட்டுள்ளது என்றும், இந்தத் திட்டத்துக்கு ரூ.1,200 செலவாகும் என்றும் மத்திய அரசு தெரிவித்துள்ளது.

மத்திய அமைச்சரவைக் கூட்டம் பிரதமா் நரேந்திர மோடி தலைமையில் புதன்கிழமை நடைபெற்றது. இந்தக் கூட்டத்தில் ‘விலை ஆதரவு’ திட்டத்தின் கீழ் துவரை, உளுந்து மற்றும் மசூா் பருப்புகளைக் கொள்முதல் செய்வதற்கான வரம்பை தற்போதைய 25%-லிருந்து 40%-ஆக அதிகரிக்கவும், சேமிப்புக் கிடங்குகளில் உள்ள 15 லட்சம் டன் கொண்டைக் கடலையை விற்பனை விலையிலிருந்து தள்ளுபடி செய்து கிலோ ரூ.8-க்கு அளிக்கவும் முடிவு செய்யப்பட்டது.

இந்தக் கொண்டைக் கடலையை மாநிலங்கள் மதிய உணவுத் திட்டம், ரேஷன், ஒருங்கிணைந்த குழந்தைகள் மேம்பாட்டுத் திட்டங்களுக்கு பயன்படுத்திக் கொள்ளலாம் என்று மத்திய அரசு தெரிவித்துள்ளது.

ராபி பருவ காலம் நெருங்கி வருவதால் சேமிப்புக் கிடங்குகளில் உள்ள கொண்டைக் கடலையை காலி செய்துவிட்டு புதிதாக விளைபொருள்களைச் சேமிக்க மத்திய அரசு இந்தத் திட்டத்தை அறிவித்துள்ளது. 2019 முதல் 22 வரையிலான பயிா்ப் பருவ காலத்தில் இதுவரை இல்லாத அளவில் 30.55 லட்சம் டன் கொண்டைக் கடலையை மத்திய அரசு கொள்முதல் செய்தது.

இந்தியா-நேபாளம் ஒப்பந்தம்: பல்லுயிா்ப் பாதுகாப்புத் துறையில் இந்தியா - நேபாளம் இடையே புரிந்துணா்வு ஒப்பந்தம் கையொப்பமாக மத்திய அமைச்சரவை ஒப்புதல் அளித்துள்ளது.

வனங்கள், வனவிலங்குகள், சுற்றுச்சூழல், பல்லுயிா்ப் பாதுகாப்பு, வழித்தடங்கள் மற்றும் ஒன்றோடொன்று இணைக்கும் பகுதிகளை மீட்டெடுப்பது, பருவநிலை மாற்றம் ஆகிய துறைகளில் ஒத்துழைப்பை வலுப்படுத்த இந்த ஒப்பந்தம் உதவும்.

5.18 கோடி மெட்ரிக் டன் அரிசி: நிகழ் கரீஃப் பருவத்தில் 5.18 கோடி மெட்ரிக் டன் அரிசி கொள்முதல் செய்ய மத்திய அரசு திட்டமிட்டுள்ளது.

மாநில உணவுத் துறைச் செயலா்கள் மற்றும் இந்திய உணவுக் கழகத்தின் ஆய்வுக் கூட்டம் நுகா்வோா் விவகாரங்கள் துறைச் செயலா் சுதான்ஷு பாண்டே தலைமையில் தில்லியில் புதன்கிழமை நடைபெற்றது. இதில், தமிழகம், ஆந்திரம், கேரளம், ஹிமாசல பிரதேசம் உள்ளிட்ட பல்வேறு மாநிலங்களின் உணவுத் துறை செயலா்கள் கலந்துகொண்டனா்.

இந்தக் கூட்டத்தில், 2022-2023 பயிா் காலத்தில் சுமாா் 5.18 கோடி மெட்ரிக் டன் அரிசியைக் கொள்முதல் செய்ய இலக்கு நிா்ணயிக்கப்பட்டது.



Read in source website

நிகழ் நிதியாண்டின் ஏப்ரல் முதல் ஜூன் வரையிலான முதல் காலாண்டில், நாட்டின் மொத்த உள்நாட்டு உற்பத்தி (ஜிடிபி) 13.5 சதவீதம் அதிகரித்துள்ளது.

கடந்த 2021-22 நிதியாண்டின் கடைசி 3 காலாண்டுகளில் பதிவான விகிதத்தைக் காட்டிலும், நிகழாண்டின் முதல் காலாண்டில் ஜிடிபி 13.5 சதவீதம் அதிகமாக பதிவாகியுள்ளதாக தேசிய புள்ளியியல் அலுவலகம் (என்எஸ்ஓ) தெரிவித்துள்ளது.

கரோனா காலத்துக்கு முந்தைய நிலையை ஒப்பிடும்போது, ஜிடிபி சுமாா் 4 சதவீதம் அதிகரித்துள்ளதாக நிதித் துறைச் செயலா் டி.வி. சோமநாதன் தெரிவித்தாா்.

மேலும், 2023-இல் நாட்டின் பொருளாதார வளா்ச்சி 7 முதல் 7.5 சதவீதமாக அதிகரிக்கும் என்றும் அவா் தெரிவித்தாா்.

நாட்டின் பொருளாதாரம் இரட்டை இலக்க விகிதத்தில் வளா்ச்சி காணும் என பெரும்பாலான நிபுணா்கள் கணித்திருந்தனா். குறிப்பாக, ஜிடிபி நிகழ் நிதியாண்டின் முதல் காலாண்டில் 13 சதவீதம் உயரும் என ‘இக்ரா’ என்ற மதிப்பீட்டு நிறுவனமும், 15.7 சதவீதம் உயரும் என பாரத ஸ்டேட் வங்கியும் கணித்திருந்தன.

கடந்த ஆகஸ்ட் மாதத்தின் தொடக்கத்தில், ரிசா்வ் வங்கியின் பணக் கொள்கை கூட்டத்தின்போது நிகழ் நிதியாண்டின் முதல் காலாண்டில் ஜிடிபி 16.2 சதவீதம் வளா்ச்சியடையும் என மதிப்பிடப்பட்டிருந்தது. இதே காலகட்டத்தில் சீனாவின் பொருளாதார வளா்ச்சி 0.4 சதவீதம் அதிகரித்துள்ளது.

நாட்டின் வருவாய்ப் பற்றாக்குறை கடந்த ஏப்ரல்-ஜூன் வரையிலான காலகட்டத்தில், நிா்ணயிக்கப்பட்ட இலக்கில் 20.5 சதவீதத்தை எட்டியதாக தலைமை கணக்கு அதிகாரி வெளியிட்ட அறிக்கையில் தெரிவிக்கப்பட்டுள்ளது.

கடந்த ஆண்டில் இதே காலகட்டத்தில், வருவாய்ப் பற்றாக்குறை அதன் இலக்கில் 21.3 சதவீதத்தை எட்டியது குறிப்பிடத்தக்கது.



Read in source website

காங்கிரஸ் தலைவா் சோனியா காந்தியின் தாயாா் பெளலா மைனோ, இத்தாலியில் உள்ள தனது இல்லத்தில் கடந்த சனிக்கிழமை (ஆகஸ்ட் 27) காலமானதாக அக்கட்சி புதன்கிழமை தெரிவித்தது.

அவரது இறுதிச்சடங்குகள் செவ்வாய்க்கிழமை (ஆகஸ்ட் 30) நடைபெற்ாகவும் தெரிவிக்கப்பட்டுள்ளது.

முன்னதாக, உடல்நலம் பாதிக்கப்பட்டிருந்த தனது தாயாரை பாா்ப்பதற்காக சோனியா காந்தி கடந்த 23-ஆம் தேதி அங்கு பயணம் மேற்கொண்டாா். ராகுல் காந்தி, பிரியங்கா காந்தி ஆகியோரும் உடன் சென்றனா்.

90 வயதை கடந்தவரான சோனியாவின் தாயாா் காலமான தகவலை காங்கிரஸ் புதன்கிழமை வெளியிட்டது. இதுகுறித்து, கட்சியின் பொதுச் செயலாளா் ஜெய்ராம் ரமேஷ் ட்விட்டரில் வெளியிட்ட பதிவில், ‘காங்கிரஸ் தலைவா் சோனியா காந்தியின் தாயாா் பெளலா மைனோ, இத்தாலியில் உள்ள தனது இல்லத்தில் கடந்த ஆகஸ்ட் 27-ஆம் தேதி காலமானாா். அவரது இறுதிச் சடங்குகள் செவ்வாய்க்கிழமை நடைபெற்றன’ என்று தெரிவித்துள்ளாா். இறுதிச் சடங்கில் சோனியா காந்தி உள்பட மூவரும் பங்கேற்ாக கட்சி வட்டாரங்கள் தெரிவித்தன.

காங்கிரஸ் கட்சியின் செயற்குழு கூட்டம் கடந்த ஞாயிற்றுக்கிழமை நடைபெற்ற நிலையில், வெளிநாட்டிலிருந்தபடி காணொலி முறையில் அவா்கள் பங்கேற்றிருந்தனா்.

குடியரசுத் தலைவா், பிரதமா் இரங்கல்: காங்கிரஸ் தலைவா் சோனியாவின் தாயாா் மறைவுக்கு குடியரசுத் தலைவா் திரெளபதி முா்மு, பிரதமா் நரேந்திர மோடி ஆகியோா் இரங்கல் தெரிவித்துள்ளனா்.

குடியரசுத் தலைவா் திரெளபதி முா்மு ட்விட்டரில் வெளியிட்ட பதிவில், ‘காங்கிரஸ் தலைவா் சோனியா காந்தியின் தாயாா் மறைவு வருத்தமளிக்கிறது. அவருக்கும், குடும்பத்தினருக்கும் ஆழ்ந்த இரங்கல்கள்’ என்று குறிப்பிட்டுள்ளாா்.

பிரதமா் மோடி வெளியிட்ட பதிவில், ‘சோனியா காந்தியின் தாயாரின் ஆன்மா சாந்தியடைய பிராா்த்திக்கிறேன். இந்த சோகமான நேரத்தில், ஒட்டுமொத்த குடும்பத்துக்கும் ஆறுதலை தெரிவித்துக் கொள்கிறேன்’ என்று குறிப்பிட்டுள்ளாா்.

காங்கிரஸின் அதிகாரபூா்வ ட்விட்டா் பக்கத்தில், சோனியா தாயாரின் மறைவுக்கு இரங்கல் தெரிவிக்கப்பட்டுள்ளது. இதேபோல், ராஜஸ்தான் முதல்வா் அசோக் கெலாட், சத்தீஸ்கா் முதல்வா் பூபேஷ் பகேல், காங்கிரஸ் ஊடகப் பிரிவு பொறுப்பாளா் பவன் கேரா, காங்கிரஸ் எம்.பி. மனீஷ் திவாரி உள்ளிட்டோரும் இரங்கல் தெரிவித்துள்ளனா்.



Read in source website

‘அவசியமற்ற வகையில் பரிந்துரைக்கப்படுகின்ற இலவசங்களால் மாநிலத்தின் நிதிநிலை கடுமையாகப் பாதிக்கப்படும் என்பதோடு, இலங்கையில் நிகழ்ந்தது போன்று பொருளாதாரத்திலும் பாதகமான விளைவுகள் ஏற்பட வாய்ப்புள்ளது’ என்று பொருளாதார நிபுணா்கள் கவலை தெரிவித்துள்ளனா்.

தோ்தல் வாக்குறுதிகளில் இலவசங்களுக்குத் தடை விதிக்க வேண்டும் என்று பாஜக நிா்வாகியும் வழக்கறிஞருமான அஸ்வினி உபாத்யாய தொடுத்த வழக்கு உச்சநீதிமன்றத் தலைமை நீதிபதி என்.வி.ரமணா, நீதிபதிகள் சி.டி.ரவிகுமாா், ஹிமா கோலி ஆகியோா் அடங்கிய அமா்வால் விசாரிக்கப்பட்டது.

இந்த வழக்கில் நீதிபதிகள் பல்வேறு கருத்துகளைத் தெரிவித்தனா். அரசியல் கட்சிகள் கொடுக்கும் இலவச வாக்குறுதிகளைத் தடுக்க முடியாது என்று கூறிய அதேவேளையில், இலவசங்களையும் நலத் திட்ட உதவிகளையும் குழப்பிக் கொள்ளக் கூடாது என்றும் நீதிபதிகள் கருத்து தெரிவித்தனா்.

இலவசங்கள் குறித்து அனைத்துக் கட்சிக் கூட்டத்தைக் கூட்டி ஏன் கருத்து கேட்கக் கூடாது என்று கேள்வி எழுப்பிய நீதிபதிகள், இலவசங்கள் குறித்த விவாதம் தேவையெனவும் அறிவுறுத்தினா்.

மேலும், இந்த வழக்கின் சிக்கலான தன்மையைக் கருத்தில் கொண்டு இந்த வழக்கை 3 நீதிபதிகள் அமா்வுக்கு மாற்றி அப்போதைய தலைமை நீதிபதி என்.வி.ரமணா உத்தரவிட்டாா்.

அதோடு, இலவசங்கள் நாட்டை திவால் நிலைக்கு தள்ளிவிட வாய்ப்புள்ளது என்ற கூறிய நீதிபதிகள், இதுதொடா்பாக மத்திய அரசு நிபுணா் குழு அமைத்து ஆராயவும் உத்தரவிட்டனா்.

இந்த நிலையில், ‘அவசியமற்ற வகையில் பரிந்துரைக்கப்படுகின்ற இலவசங்களால் மாநிலத்தின் நிதிநிலை கடுமையாகப் பாதிக்கப்படும் என்பதோடு, இலங்கையில் நிகழ்ந்தது போன்று பொருளாதாரத்திலும் பாதகமான விளைவுகள் ஏற்பட வாய்ப்புள்ளது’ என்று பொருளாதார நிபுணா்கள் கவலை தெரிவித்துள்ளனா்.

இதுகுறித்து பொருளாதார நிபுணரும் சா்வதேச பொருளாதார தொடா்புகள் குறித்த ஆராய்ச்சிக்கான இந்திய கவுன்சில் (ஐசிஆா்ஐஇஆா்) தலைவருமான பிரமோத் பாசின் கூறியதாவது:

அவசியமற்ற வகையில் பரிந்துரைக்கப்படுகின்ற பெரும்பாலான இலவசங்கள் மாநில நிதிநிலையில் குறிப்பிடத்தக்க பாதகமான விளைவுகளை ஏற்படுத்தும். பல மாநிலங்கள் இந்த வகையிலான இலவசத் திட்டங்களை அறிவித்து நடைமுறைப்படுத்தி வருகின்றன.

அரசியல் நிா்ப்பந்தங்கள் காரணமாக, வாக்குகளை ஈா்ப்பதற்காக பெரும்பாலான அரசியல்வாதிகள் இதுபோன்ற இலவசத் திட்டங்களை அறிவிக்கின்றனா். ஒவ்வொரு மாநிலத்திலும் மற்றும் மத்தியிலும் இதுபோன்ற இலவச அறிவிப்புகளைக் கட்டுப்படுத்துவதற்கு வழி இருந்தால், அது வரவேற்கத்தக்க நடவடிக்கையாக இருக்கும். ஆனால், அவ்வாறு கட்டுப்படுத்துவதற்கான நடவடிக்கை குறித்து தோ்ந்தெடுக்கப்பட்ட பிரதிநிதிகள்தான் முடிவு செய்ய வேண்டும். மேலும், இலவசங்கள் நலத் திட்ட செலவினங்களிலிருந்து எந்த வகையில் வேறுபட்டவை என்பதை தெளிவாக விளக்குவதும் அவசியமாகும் என்று அவா் கூறினாா்.

தொழிலக மேம்பாட்டுக் கல்விக்கான நிறுவன (ஐஎஸ்ஐடி) இயக்குநா் நாகேஷ் குமாா் கூறுகையில், ‘மாநில அரசுகள் நிதி நிா்வாகத்தில் பொறுப்புடன் நடந்துகொள்ள வேண்டும். இல்லையெனில் நிலையற்ற சூழலுக்குள் மாநிலம் செல்ல நேரிடும். மாநில அரசுகளால் கொடுக்கப்படும் இலவசங்களால், மாநில நிதிநிலை கடுமையாகப் பாதிக்கப்பட வாய்ப்புள்ளது. இலங்கையில் ஏற்பட்டதுபோன்று, கடுமைான பொருளாதார பாதிப்பைச் சந்திக்க வேண்டிய சூழலும் ஏற்பட வாய்ப்புள்ளது’ என்றாா்.

பி.ஆா்.அம்பேத்கா் பொருளாதார பள்ளி (பிஏஎஸ்இ) துணைவேந்தா் என்.ஆா். பானுமூா்த்தி கூறுகையில், ‘இலவசங்களுக்கும், நலத் திட்ட செலவினங்களுக்கும் இடையேயான வேறுபாட்டை வரையறுப்பது மிக முக்கியம். அத்தகைய கொள்கைகள் அறிமுகப்படுத்தப்படும்போதுதான், பல மாநிலங்களில் ஏற்கெனவே மோசமாகி வரும் பொதுக் கடன் நிலைமை மீது கவனம் செலுத்தவும், நியாயமான ஊக்குவிப்புகளை அறிமுகப்படுத்தி நிலைமையை மேம்படுத்தவும் நடவடிக்கை எடுக்க முடியும்’ என்றாா்.



Read in source website

‘பருவநிலை மாறுபாடு பிரச்னைக்கு தீா்வு காணும் நோக்கத்துடன் இந்தியா உறுதியாக செயல்படுகிறது’ என்று மத்திய சுற்றுச்சூழல் துறை அமைச்சா் பூபேந்தா் யாதவ் தெரிவித்தாா்.

இந்தோனேசியாவின் பாலி தீவில், ஜி20 கூட்டமைப்பு நாடுகளின் சுற்றுச்சூழல் மற்றும் பருவநிலை துறை அமைச்சா்களின் கூட்டம் புதன்கிழமை தொடங்கியது. இதில், பூபேந்தா் யாதவ் பங்கேற்றுப் பேசியதாவது:

பருவநிலை மாறுபாட்டுக்கு முக்கியக் காரணியான பசுமை இல்ல வாயுக்களை நெடுங்காலமாக வெளியிட்டு வரும் நாடு இந்தியா கிடையாது. ஆனால், இப்பிரச்னைக்கு தீா்வு காணும் வல்லமை உள்ள நாடு என்ற அடிப்படையில் இந்தியா தீா்க்கத்துடன் செயலாற்றுகிறது.

பருவநிலை மாறுபாடு பிரச்னையை கையாளும் நடவடிக்கைகளுக்கான நிதி குறித்த வளா்ந்த நாடுகளின் உறுதிமொழிகள் கானல்நீராகவே உள்ளன. அந்த உறுதிமொழிகளின் செயலாக்க வேகமும் அளவுகோலும் உலகளாவிய நோக்கங்களுடன் பொருந்துவதாக இல்லை.

பசுமை இல்ல வாயுக்களின் வெளியீட்டுக்கும் வளிமண்டலத்தில் இருந்து அவற்றை அகற்றுவதற்குமான சமநிலையை எட்டுவது, அந்த வாயுக்களின் பங்களிப்புக்கு பொறுப்பான நாடுகளின் கையில்தான் உள்ளது.

கரியமில வாயுவை குறைந்த அளவில் வெளியேற்றும் தொழிலக மாற்றங்களை நோக்கி பயணிக்க இந்தியா முழுமையாக உறுதிபூண்டுள்ளது. இதற்காக பன்முக அணுகுமுறை கையாளப்படுகிறது.

அனைத்து வீடுகளுக்கும் மின்சாரம், சமையல் எரிவாயு இணைப்புகள் வழங்குவதில் சமீப ஆண்டுகளாக குறிப்பிடத்தக்க வளா்ச்சி எட்டப்பட்டுள்ளது. புதுப்பிக்கத்தக்க எரிசக்தித் துறையில் உலகின் மிகப்பெரிய சந்தைகளில் ஒன்றாக இந்தியா உருவெடுத்துள்ளது.

கரியமில வாயு வெளியேற்றத்தைக் குறைப்பதில் சவாலாக விளங்கும் குறிப்பிட்ட துறைகளில் மாற்றத்தை ஏற்படுத்த, தேசிய பசுமை ஹைட்ரஜன் திட்டத்தின்கீழ் உறுதியேற்கப்பட்டுள்ளது.

பருவநிலை மாற்றத்தால் ஏற்படும் விளைவுகளால் ஏழை நாடுகள்தான் அதிகம் பாதிக்கப்படுகின்றன. பருவநிலை மாற்ற பிரச்னைக்கு குறைந்த அளவில் காரணமாக இருக்கும் இந்நாடுகள், அதிக பாதிப்பை எதிா்கொள்வது முறையற்றது. இந்த நிலையை மாற்றுவதற்காக, ஏழை நாடுகளுக்கு தொழில்நுட்பம், திறன், நிதிசாா்ந்த உதவிகள் தேவைப்படுகின்றன என்றாா் அவா்.

ஜி20 கூட்டமைப்பில் ஆா்ஜென்டீனா, ஆஸ்திரேலியா, பிரேசில், கனடா, சீனா, பிரான்ஸ், ஜொ்மனி, இந்தியா, இந்தோனேசியா, இத்தாலி, ஜப்பான், தென் கொரியா, மெக்சிகோ, ரஷியா, சவூதி அரேபியா, தென்ஆப்பிரிக்கா, துருக்கி, பிரிட்டன், அமெரிக்கா, ஐரோப்பிய ஒன்றியம் ஆகியவை இடம்பெற்றுள்ளன.

 

Image Caption

இந்தோனேசியாவின் பாலி தீவில் புதன்கிழமை தொடங்கிய ஜி20 கூட்டமைப்பு நாடுகளின் சுற்றுச்சூழல் மற்றும் பருவநிலை துறை அமைச்சா்களின் கூட்டத்தில் பேசிய மத்திய அமைச்சா் பூபேந்தா் யாதவ்.

 



Read in source website

நியூஸிலாந்து ஆல்-ரவுண்டா் காலின் டி கிராண்ட்ஹோம் (36), சா்வதேச கிரிக்கெட்டிலிருந்து ஓய்வுபெறுவதாக புதன்கிழமை அறிவித்தாா்.

2012-இல் தென்னாப்பிரிக்காவுக்கு எதிரான ஒன் டே மூலம் சா்வதேச கிரிக்கெட்டில் தடம் பதித்த கிராண்ட்ஹோம், கடைசியாக கடந்த ஜூனில் இங்கிலாந்துக்கு எதிரான டெஸ்டில் விளையாடியிருந்தாா். நியூஸிலாந்துக்காக 3 ஃபாா்மட்டுகளிலுமாக 115 ஆட்டங்களில் 2,677 ரன்கள் சோ்த்து, 101 விக்கெட்டுகளும் சாய்த்திருக்கிறாா்.

டெஸ்ட்: 29 ஆட்டங்கள்; 1,432 ரன்கள்; அதிகபட்சம் 120; விக்கெட்டுகள் 49.

ஒன் டே: 45 ஆட்டங்கள்; 742 ரன்கள்; அதிகபட்சம் 74; விக்கெட்டுகள் 30.

டி20: 41 ஆட்டங்கள்; 503 ரன்கள்; அதிகபட்சம் 59; விக்கெட்டுகள் 12.

ஐபிஎல்: 25 ஆட்டங்கள்; 303 ரன்கள்; அதிகபட்சம் 40; விக்கெட்டுகள் 6.



Read in source website

பாகிஸ்தானில் கடந்த ஜூன் மாதம் முதல் பெய்து வரும் கனமழை வெள்ளத்தால் பாதிக்கப்பட்ட பகுதிகளில் 50 லட்சம் பேருக்கு டைபாய்டு, வயிற்றுப்போக்கு போன்ற கடுமையான நோய்கள் பரவுவதற்கான அபாயம் உள்ளதாக நிபுணர்கள் எச்சரித்துள்ளனர். ஏற்கெனவே, மழை வெள்ளத்துக்கு 1,100-க்கு மேற்பட்டவர்கள் பலியாகியுள்ளதாக புள்ளிவிவரங்கள் தெரிவிக்கின்றன.
 



Read in source website

"ஆசியாவின் நோபல் பரிசு' என்றழைக்கப்படும் பிலிப்பின்ஸின் மகசேசே விருதுக்காக, கம்போடியாவில் அரசின் அடக்குமுறையால் பாதிக்கப்பட்டவர்களுக்கு உதவிய மனநல மருத்துவர் சொதியாரா சிம் (54), வன்கொடுமைக்குள்ளான ஆயிரக்கணக்கான சிறுவர்களுக்கு உதவிய பிலிப்பின்ஸ் மருத்துவர் பெர்னடெட் மேட்ரிட் (64) ஆகியோர் தேர்ந்தெடுக்கப்பட்டுள்ளனர்.



Read in source website

நிலவுக்கு மனிதர்களை அனுப்புவதற்கு முன்னோட்டமாக சோதனை முறையில் அந்த துணைக் கோளுக்கு ராக்கெட் மூலம் ஆய்வுக் கலம் சனிக்கிழமை அனுப்பப்படும் என்று அமெரிக்க விண்வெளி ஆய்வு அமைப்பான நாசா அறிவித்துள்ளது. என்ஜின் கோளாறு காரணமாக திங்கள்கிழமை அந்த ராக்கெட்டை ஏவும் பணி நிறுத்திவைக்கப்பட்டது.
 



Read in source website

இந்தியா - ரஷியா இடையேயான ஆழமான உறவுக்கு வலுப்பெற காரணமாக இருந்த, சோவியத் யூனியனின் கடைசி அதிபா் மிக்கைல் கோா்பசேவ் காலமானாா்.

1985-இல் சோவியத் யூனியனின் கடைசி அதிபராக பொறுப்பேற்ற மிக்கைல் கோா்பசேவ் பல்வேறு சீா்திருத்தங்களை மேற்கொண்டாா். சோவியத் யூனியனில் இருந்து நாடுகள் பிரிந்து செல்லும் உரிமையையும் கோா்பசேவ் அனுமதித்தாா். அதன் விளைவாக 1991-இல் சோவியத் ஒன்றியம் என்கிற கட்டமைப்பு கலைந்து போய் அதில் இடம்பெற்றிருந்த 15 நாடுகள் சுதந்திர நாடுகளாகின. அவருடைய இந்த முயற்சி காரணமாக, குறிப்பிடத்தக்க தலைவராக மேற்கத்திய சக்திகளால் கோா்பசேவ் பாராட்டப்பட்டாா். அதே நேரம், சோவியத் யூனியன் சீா்குலைவதற்கு காரணமானவா் என ரஷியா்கள் அவருக்கு எதிா்புகளையும் கண்டனங்களையும் தெரிவித்தனா்.

1990-இல் அமைதிக்கான நோபல் பரிசு கோா்பசேவுக்கு வழங்கப்பட்டது.

இந்தியா - ரஷியா இடையேயான உறவு வலுப்பெறுவதில் அவா் முக்கிய பங்காற்றியவா். 1986 மற்றும் 1988-ஆம் ஆண்டுகளில் இந்தியாவுக்கு பயணம் மேற்கொண்டாா். பாகிஸ்தானுடன் அமெரிக்கா மிகுந்த நெருக்கம் காட்டிவந்த சூழலில், கோா்பசேவ் 1986-இல் முதன் முறையாக இந்திய பயணம் மேற்கொண்டது இந்த பிராந்தியத்தில் புவிசாா் அரசியல் அதிகாரப் போட்டியில் முக்கியத்துவம் வாய்ந்ததாக பாா்க்கப்பட்டது. நூற்றுக்கும் அதிகமான உறுப்பினா்களைக் கொண்ட குழுவினருடன் இந்தியா வந்த அவா், அப்போதைய பிரதமா் ராஜீவ் காந்தியுடன் விரிவான ஆலோசனைகளை மேற்கொண்டு இருதரப்பு உறவை வலுப்படுத்து உறுதியேற்றதோடு, அணு ஆயுதங்களை கைவிடுவதற்கும் உறுதியேற்றனா். அவா் இரண்டாவது முறையாக 1988-இல் இந்திய பயணம் மேற்கொண்டபோது, தில்லி தீா்மானத்தை நடைமுறைப்படுத்துவது குறித்து இரு தரப்பில் ஆய்வு செய்யப்பட்டதோடு, பாதுகாப்பு, விண்வெளி, உள்கட்டமைப்பு மற்றும் பிற துறைகளில் இரு நாடுகளிடையேயான உறவை மேலும் வலுப்படுத்துவதற்கும் உறுதியேற்கப்பட்டது.

இந்த நிலையில், வயது மூப்பு மற்றும் உடல்நலக்குறைவால் ரஷிய தலைநகா் மாஸ்கோவில் உள்ள மருத்துவமனையில் அனுமதிக்கப்பட்டிருந்த மிகைல் கோா்பசேவ் செவ்வாய்கிழமை உயிரிழந்ததாக அறிவிக்கப்பட்டுள்ளது. கோா்பசேவ் மறைவுக்கு பல்வேறு உலகத் தலைவா்கள் இரங்கல் தெரிவித்துள்ளனா்.

காங்கிரஸ் மூத்த தலைவா் சசி தரூா் வெளியிட்ட இரங்கல் செய்தியில், ‘சோவியத் யூனியனை மாற்றி ஜனநாயகத்துக்கு வழிவகுத்தவா்’ என்று பலராலும், ‘மறுசீரமைப்பு மற்றும் வெளிப்படைத் தன்மை கொள்கைகளால் சோவியத் யூனியன் சீா்குலைவதற்கு காரணமானவா்’ என்று சிலராலும் கோா்பசேவ் நினைவில் கொள்ளப்படுவாா். இவரை இத்தாலியில் இரண்டு முறை நேரில் சந்திக்கும் வாய்ப்பு கிடைத்தது. அவருடைய மறைவுக்கு இரங்கல்’ என்று தெரிவித்துள்ளாா்.

 



Read in source website

நாட்டின் 8 முக்கிய உள்கட்டமைப்புத் துறைகளின் வளா்ச்சி கடந்த ஜூலை மைதம் 4.5 சதவீதமாக சரிந்துள்ளது.

இது குறித்து அரசின் புள்ளிவிவரங்கள் தெரிவிப்பதாவது: கடந்த ஆண்டு ஜூலை மாதத்தோடு ஒப்பிடுகையில், நிலக்கரி, கச்சா எண்ணெய், இயற்கை எரிவாயு, சுத்திகரிப்பு பொருள்கள், உரம், எஃகு, சிமென்ட் மற்றும் மின்சாரம் ஆகிய எட்டு உள்கட்டமைப்பு துறைகளின் உற்பத்தி கடந்த ஜூலை மாதத்தில் 4.5 சதவீதமாக குறைந்தது. இது ஆறு மாதங்களில் இல்லாத மிகப் பெரிய சரிவாகும். கடந்த ஆண்டின் ஜூலையில் அந்தத் துறைகளின் உற்பத்தி 9.9 சதவீதமாக இருந்தது.

இந்த உள்கட்டமைப்பு துறைகளின் உற்பத்தி கடந்த ஜூன் மாதத்தில் 13.2 சதவீதமாகவும், மே மாதத்தில் 19.3 சதவீதமாகவும், ஏப்ரலில் 9.5 சதவீதமாகவும், மாா்ச்சில் 4.8 சதவீதமாகவும், பிப்ரவரியில் 5.9 சதவீதமாகவும், ஜனவரியில் 4 சதவீதமாகவும் அதிகரித்தது என்று புள்ளிவிவரங்கள் தெரிவிக்கின்றன.

 



Read in source website

திருப்பத்தூர்: திருப்பத்தூர் அடுத்த ஜவ்வாது மலையில் உள்ள ஜமுனாமரத்தூர் அருகேயுள்ள கூட்டத்தூர் என்ற சிறிய கிராமத்தில் பல்லவர் காலத்து நடுகற்கள் கண்டெடுக்கப்பட்டுள்ளன.

திருப்பத்தூர் தூய நெஞ்சக்கல்லூரியின் தமிழ்த்துறை பேராசிரியர் முனைவர் க. மோகன்காந்தி தலைமையில், வணிகவியல் பேராசிரியர் ராஜ்குமார், காணிநிலம் மு. முனசாமி மற்றும் ஆய்வு மாணவர்கள் கொண்ட குழுவினர் மாவட்டத்தில் பல்வேறு இடங்களில் களஆய்வு நடத்தி வருகின்றனர். அந்தவகையில், திருப்பத்தூரை அடுத்த ஜவ்வாது மலையில் களஆய்வு நடத்திய போது பல்லவர் காலத்தைச் சேர்ந்த நடுகற்கள் தொடர்ச்சியாக இருப்பதை கண்டறிந்தனர்.

இது குறித்து பேராசிரியர் முனைவர் க. மோகன்காந்தி ‘இந்து தமிழ் திசை’ இணையத்திடம் கூறியதாவது, ‘‘திருப்பத்தூர் மாவட்டம் ஜவ்வாதுமலை, வேலூர் மாவட்டம் அமர்தியில் தொடங்கி போளூர், செங்கம், ஆலங்காயம் வட்டங்களில் பரவி சிங்காரப்பேட்டையில் முடிவடைகிறது. ஏறத்தாழ 250 கி.மீ., சுற்றளவு கொண்ட இந்த மலையில் சுமார் 420 மலைக்கிராமங்களில் 2.50 லட்சம் மக்கள் வசிக்கின்றனர். இந்த மலையானது பல்வேறு வரலாற்று ஆவணங்களை தன்னகத்தே கொண்டுள்ளது.

குறிப்பாக ஏராளமான பாறை ஓவியங்கள், கற்கோடாரிகள், கற்திட்டைகள், கல்வெட்டுகள், செப்பேடுகள், ஓலைச்சுவடிகள், ஏராளமான நடுகற்கள் இந்த மலையில் கண்டெடுக்கப்பட்டுள்ளன. இந்நிலையில், ஜவ்வாது மலையில் உள்ள ஜமுனாமரத்தூர் அருகேயுள்ள கூட்டத்தூர் என்ற சிறிய கிராமத்தில் நாங்கள் கள ஆய்வு மேற்கொண்டோம்.

இந்த கூட்டாத்தூரில் உள்ள ஏரிக்கு மேல் அடர்ந்த வனப்பகுதி அமைந்துள்ளது. இந்த இடத்தில் பல்லவர் காலத்தைச் சேர்ந்த கொற்றவை சிலையும், 4 நடுகற்களும் இருப்பதை கண்டெடுத்துள்ளோம். கொற்றவை சிலையை, ஆநிரை கவர்தல், நாட்டை பிடிக்கும் போரில் வெற்றி பெற வேண்டி கொற்றவையைப் போர் மறவர்கள் வணங்குவது மரபு.

அந்தவகையில், பல்லவர் காலத்து கலை நுணுக்கத்துடன் இந்த கொற்றவை சிலை அமைந்துள்ளது. இச்சிலையானது 37 அங்குலம் உயரமும், 27 அங்குலம் அகலமும் கொண்ட பலகைக் கல்லில் அமைந்துள்ளது. இதில், உள்ள எழுத்துப் பொறிப்புகள் சிதைந்துள்ளதால் அவைகளை முழுமையாக படிக்க முடியவில்லை.

சிலையில் வலதுபக்கம் முடிக்கப்பட் கொண்டையுடனும், இடது கையை இடுப்பில் ஊன்றியும், வலது கையில் கத்தியை தாங்கியும் உள்ளது. இடுப்புக்கு கீழ்ப்பகுதியில் மண்ணில் ஆழமாக புதைந்துள்ளது. 2-வது நடுக்கல் 2 -ஆக உடைந்துள்ளது. இந்த கல்லானது 37 அங்கலமும் உயரமும், 28 அங்குலம் அகலமும் கொண்டுள்ளது.

நடுகல் வீரனின் இடது கையில் வில்லும் வலது கையில் குறுவாளும் உள்ளது. இந்த நடுகல்லிலும் எழுத்துப் பொறிப்புகள் சிதைந்த நிலையிலேயே காட்சித் தருகின்றன. 3-வது நடுக்கல்லானது 40 அங்குலம் உயரமும், 27 அங்குலம் அகலமும் கொண்டுள்ளது. இதில் உள்ள வீரனின் வலது கையில் குறுவாளும், இடது கையில் வில்லும் கொண்டுள்ளது.

5-வது நடுகல்லானது 50 அங்குலம் உயரமும், 27 அங்குலம் அகலமும் கொண்டுள்ளது. இதில் உள்ள வீரன் வலது பக்க கொண்டையுடன், வலது கையில் குறுவாளும், இடது கையில் வில்லுடன் காட்சி தருகிறார். இந்த வீரனின் கழுத்துப்பகுதியில் ஒரு அம்பும், வயிற்றுப்பகுதியில் ஒரு அம்பும் பாய்ந்துள்ளதைப் போல காட்சி சித்திரிக்கப்பட்டுள்ளது. இதில் உள்ள எழுத்துக்கள் தெளிவாக இல்லை.

இந்த 5 நடுகற்களுக்கு அருகே கூடுதலாக 2 நடுகற்கள் உள்ளன. அதில், முதல் நடுகல் 5 அடி அகலமும், 4 அடி உயரமும் கொண்ட பிரமாண்டமான பலகை கல்லில் செதுக்கப்பட்டுள்ளது. இந்த நடுகல் வீரன் தனது 2 கைகளால் இரண்டு மாடுகளை பிடித்துக்கொண்டுள்ளதை போல காட்சிப்படுத்தப்பட்டுள்ளது.

மற்றொரு நடுகல் 2-ஆக உடைந்துள்து. அதில் ஒரு பாகம் மட்டுமே காண முடிந்தது. இந்த நடுகற்கள் விஜயநகர காலத்தைச் சேர்ந்த உடன்கட்டை நடுகல்லாகும். இந்த அரிய வகை நடுகற்களை ஆய்வு செய்தால் மேலும் கூடுதல் தகவல்கள் நமக்கு கிடைக்கும் என்பதால் மாவட்ட நிர்வாகம், தொல்லியல் துறையினர் நடுகற்களை ஆய்வுப்படுத்த முன்வர வேண்டும்’’ என்றார்.



Read in source website

மதுரை : தமிழ்நாடு மின்சார ஒழுங்குமுறை ஆணையத்தில் சட்ட உறுப்பினர் பணியிடத்தை நிரப்பும் வரை மின் கட்டணத்தை உயர்த்த தடை விதித்து தனி நீதிபதி பிறப்பித்த உத்தரவுக்கு இடைக்கால தடை விதிக்கப்பட்டுள்ளது.

தமிழ்நாடு நூற்பாலைகள் சங்க தலைமை ஆலோசகர் கே.வெங்கடாச்சலம், அருணா அலாய்ஸ் ஸ்டீல் நிறுவன மேலாண்மை இயக்குனர் அருண் அருணாச்சலம், ஸ்ரீபதி பேப்பர் அன்ட் போர்ட்ஸ் நிறுவன பொது மேலாளர் ஜி.ஸ்ரீனிவாசன் ஆகியோர் உயர் நீதிமன்ற கிளையில் தாக்கல் செய்த மனு: "தமிழ்நாடு மின்சார ஒழுங்குமுறை ஆணையத்தில் தலைவர் மற்றும் 2 உறுப்பினர்கள் (தொழில்நுட்ப உறுப்பினர், சட்டத்துறை உறுப்பினர்) இருக்க வேண்டும். தற்போது தலைவர் மற்றும் தொழில்நுட்ப உறுப்பினர் மட்டுமே உள்ளனர். சட்டத்துறை உறுப்பினர் இல்லை.

இந்நிலையில், தமிழகத்தின் மின் கட்டணத்தை உயர்த்த அனுமதி கோரி மின்வாரியம் சார்பில் ஒழுங்குமுறை ஆணையத்தில் மனு தாக்கல் செய்யப்பட்டது. இந்த மனுவை ஒழுங்குமுறை ஆணையம் விசாரணைக்கு ஏற்றுள்ளது. தற்போது பொதுமக்களிடம் கருத்து கேட்பு கூட்டங்கள் நடத்தப்படுகிறது. இதனால் ஒழுங்குமுறை ஆணையத்தில் சட்டத்துறை உறுப்பினர் பணியிடத்தை நிரப்பும் வரை கட்டண உயர்வு தொடர்பாக முடிவெடுக்கவும், கருத்து கேட்பு கூட்டம் நடத்தவும் தடை விதிக்க வேண்டும்". இவ்வாறு மனுவில் கூறப்பட்டிருந்தது.

இதனை விசாரித்த நீதிபதி ஜி.ஆர்.சுவமிநாதன், தமிழ்நாடு மின்சார ஒழுங்குமுறை ஆணையத்தில் சட்டத்துறை உறுப்பினர் நியமிக்கும் வரை தமிழ்நாடு மின்வாரியம் அளித்த மின் கட்டண உயர்வு கோரிக்கை மனு மீது இறுதி உத்தரவு பிறப்பிக்க தடை விதித்து உத்தரவிட்டார்.

இந்நிலையில், தனி நீதிபதி உத்தரவை ரத்து செய்யக் கோரி தமிழக அரசு சார்பில் உயர் நீதிமன்ற கிளையில் மேல்முறையீடு மனு தாக்கல் செய்யப்பட்டது. அதில், "தமிழக மின்வாரிய ஒழுங்குமுறை ஆணையத்தில் சட்டத்துறை உறுப்பினரை நியமிக்கும் வரை மின் கட்டணம் உயர்வு தொடர்பான மனு மீது இறுதி உத்தரவு பிறப்பிக்க தடை விதித்து தனி நீதிபதி உத்தரவிட்டுள்ளார்.

ஒரு பணியிடம் காலியாகும் போது, அந்த காலியிடத்துக்கு தகுதியான நபர்களை தேர்வு செய்ய நடவடிக்கை எடுக்கப்படும். அதனடிப்படையில் தமிழக மின்வாரிய ஒழுங்குமுறை ஆணையத்தில் காலியாக உள்ள சட்ட உறுப்பினர் பணியிடத்தை நிரப்ப அறிவிப்பு வெளியிடப்பட்டுள்ளது. அதற்கு தகுதியான நபரை தேர்வு செய்யும் பணி நடைபெற்று வருகிறது. இதை கருத்தில் கொள்ளாமல் மின் கட்டண கோரிக்கை மனு மீது இறுதி உத்தரவு பிறப்பிக்க தன நீதிபதி தடை விதித்துள்ளார். இதனால் தமிழக அரசுக்கு பெரும் வருவாய் இழப்பு ஏற்படும். இதை கருத்தில் கொண்டு தனி நீதிபதியின் உத்தரவை ரத்து செய்ய வேண்டும். அதுவரை தனி நீதிபதி உத்தரவுக்கு இடைக்கால தடை விதிக்க வேண்டும்" எனக் கூறப்பட்டிருந்தது.

இந்த மனு நீதிபதிகள் எஸ்.எஸ்.சுந்தர், எஸ்.ஸ்ரீமதி அமர்வில் விசாரணைக்கு வந்தது. பின்னர் தமிழக மின்வாரியத்தின் மின் கட்டண உயர்வு கோரிக்கை மீது இறுதி முடிவெடுக்க தமிழ்நாடு மின்சார ஒழுங்குமுறை ஆணையத்துக்கு தடை விதித்து தனி நீதிபதி பிறப்பித்த உத்தரவுக்கு இடைக்கால தடை விதித்து விசாரணையை நீதிபதிகள் ஒத்திவைத்தனர்.



Read in source website

திருவனந்தபுரம்: ஒருமுறை பயன்படுத்தி தூக்கி எறியும் "யூஸ் அண்ட் த்ரோ" நுகர்வு கலாசாரம் நமது திருமண உறவுகளை வெகுவாக பாதித்துள்ளது என்று கேரள உயர் நீதிமன்றம் தெரிவித்துள்ள கருத்து ஒன்று சர்ச்சையை ஏற்படுத்தியுள்ளது.

கேரள உயர் நீதிமன்றத்தில் விவாகரத்து கோரி கணவனால் தாக்கல் செய்யப்பட்ட மேல்முறையீட்டு மனு ஒன்று நீதிபதிகள் முகமது முஸ்டாக், சோபி தாமஸ் ஆகியோர் அடங்கிய அமர்வில் விசாரணைக்கு வந்தது. வழக்கினை விசாரித்த நீதிபதிகள் அளித்த தீர்ப்பு: சாதாரணச் சண்டைகள், பிணக்குகள், உணர்ச்சி கொந்தளிப்பில் எடுக்கும் முடிவுகளை விவாகரத்துக்கான காரணமாக சொல்லக்கூடாது

ஆழமான பிணைப்புகளுக்கு பெயர் பெற்றிருந்த நமது திருமண உறவுகள் தற்சமயம் சின்னச்சின்ன சண்டைகள், சுயநலம், திருமணத்தை மீறிய உறவு போன்றவைகளால், குழந்தைகளைக்கூட கவனத்தில் கொள்ளாத அளவிற்கு தடுமாறி வருகிறது. இன்றைய இளைய தலைமுறையினர் திருமணம் ஒரு தீமையைப் போல கருதுகிறார்கள். பொறுப்புகள் இல்லாத சுதந்திரமான வாழ்க்கையை வாழ்வதற்கு திருமணம் தடையாக இருக்கும் என்று நினைக்கின்றனர்.

‘WIFE’ என்ற வார்த்தையின் ‘Wise Investment For Ever’ என்ற அர்த்தத்தை ‘Worry Invited For Ever’ என்று மாற்றியிருக்கின்றனர். நுகர்வு கலாசாரத்தின் யூஸ் அண்ட் த்ரோ பண்பும் நமது திருமண பந்தத்தை வெகுவாக பாதித்திருக்கிறது. அதிகரித்து வரும் லிவிங்க் டூ கெதர் கலாச்சாரத்தால் இணையர்கள் தங்களுக்குள் சிறிது இடைவெளியை உணரும் நிலையில் மிக எளிதாக "குட் பை" சொல்லிவிடுகிறார்கள் என்று வேதனை தெரிவித்திருந்தானர்.

இறையுணர்வும் சட்டமும் திருமணத்தை ஒரு குடும்ப அமைப்பாக பார்க்கின்றன. அதனால் சம்பந்தப்பட்டவர்கள் தாங்கள் பிரிந்து செல்வதற்கான சட்டரீதியான காரணங்களை கண்டறியும் வரை இந்த திருமண உறவில் இருந்து பிரிந்து செல்லக்கூடாது என்று தங்களது தீர்ப்பில் தெரிவித்திருந்தனர்.



Read in source website

சென்னை: ஜொமோட்டோ, புதிதாக 'இன்டர்சிட்டி லெஜெண்ட்ஸ்' (Intercity legends) என்கிற புதிய சேவையைத் தொடங்கியுள்ளது. இந்த சேவையானது நகரங்களுக்கு இடையேயான உணவு விநியோக சேவையை வழங்கவுள்ளது.

அதாவது, கொல்கத்தாவின் தனித்துவ அடையாளமான ரசகுல்லாவையும், ஹைதராபாத்தின் பேமஸ் உணவான பிரியாணியையும் நீங்கள் சென்னையில் இருந்தே ஆர்டர் செய்து பெற முடியும். இந்தியாவின் பிற நகரங்களில் உள்ள பிரபலமான உணவகங்களில் இருந்து ஸ்பெஷல் உணவுகளை மற்ற நகரங்களில் இருந்து ஆர்டர் செய்ய முடியும். ஆனால், இன்று ஆர்டர் செய்தால் அதிகபட்சமாக ஒரு நாளுக்குள் உணவு டெலிவரி செய்யப்படும். பெரும்பாலும் பேக்கிங் செய்யப்பட்ட உணவுகளை டெலிவரி செய்யப்படும் என்று ஜொமோட்டோ நிறுவனர் தீபிந்தர் கோயல் தெரிவித்துள்ளார்.

இதுதொடர்பாக அவர் தனது வலைதள பக்கத்தில், "கொல்கத்தாவில் இருந்து ரசகுல்லா, ஹைதராபாத்தில் இருந்து பிரியாணி, பெங்களூரில் இருந்து மைசூர் பாக், லக்னோவில் இருந்து கபாப், டெல்லியில் இருந்து பட்டர் சிக்கன் போன்ற தனித்தன்மை கொண்ட உணவுகளை வாடிக்கையாளர்களுக்கு ஆர்டர் செய்து ருசிக்க இன்டர்சிட்டி லெஜெண்ட்ஸ் திட்டம் உதவும்" என்று தெரிவித்துள்ளார்.

இப்போதைக்கு, குர்கான் மற்றும் தெற்கு டெல்லியில் வசிப்பவர்களுக்கு மட்டுமே இந்த சேவையை பெற முடியும். இதற்கு கிடைக்கும் வரவேற்பை தொடர்ந்து விரைவில் நாடு முழுவதும் இந்த சேவையை விரிவுபடுத்த ஜொமோட்டோ திட்டமிட்டுள்ளது. குர்கான் மற்றும் தெற்கு டெல்லியில் வசிப்பவர்கள் ஆர்டர் செய்ய வேண்டிய நகரங்களின் பட்டியலில் கொல்கத்தா, ஹைதராபாத், லக்னோ, ஜெய்ப்பூர், பெங்களூர், மதுரா, சென்னை, ஆக்ரா மற்றும் புவனேஸ்வர் ஆகியவை இடம்பெற்றுள்ளன.

ஒவ்வொரு நகரத்தில் இருக்கும் எல்லா உணவகங்களும் காட்டப்படுவதில்லை. என்றாலும் நகரின் சில பழமையான மற்றும் பேமஸ் உணவகங்கள் மட்டும் டெலிவரிக்கு அனுமதிக்கப்படுகின்றன.

உணவு எவ்வாறு விநியோகிக்கப்படுகிறது?

இந்த ஸ்கீம் மூலம் உணவு ஆர்டர் செய்பவர்களுக்கு உணவகங்களில் புதிதாக தயார் செய்யப்பட்டு விமானம் மூலம் அனுப்பப்படும். விமானப் பயணத்தின் போது உணவு பாதுகாப்பாக இருப்பதற்கு ஏதுவாக மீண்டும் பயன்படுத்தக்கூடிய மற்றும் சேதமடையாத அதிநவீன மொபைல் குளிர்பதன தொழில்நுட்பம் கொண்ட பாக்ஸ்களில் உணவு பேக் செய்யப்படும். வாடிக்கையாளர்கள் உணவைப் பெற்றவுடன் மைக்ரோவேவ், ஏர்-ஃப்ரை அல்லது பான்-ஃப்ரை மூலம் உணவை சூடுபடுத்தி கொள்ளலாம் என்று ஜொமோட்டோ விளக்கமளித்துள்ளது. அடுத்து சில வாரங்களில் இந்த சேவை நாடு முழுவதும் விரிவுபடுத்தப்படும் என்றும் அறிவித்துள்ளது.



Read in source website

மாஸ்கோ: சோவியத் யூனியனின் கடைசி அதிபராக அறியப்பட்ட மிகைல் கோர்பசேவ் வயது முதிர்வுக் காரணமாக மரணம் அடைந்தார். அவருக்கு வயது 91. அமைதியின் பிம்பமாக கடந்த காலங்களில் அறியப்பட்ட மிகைல் கோர்போசேவ் மறைவுக்கு உலகத் தலைவர்கள் பலரும் இரங்கல் தெரிவித்துள்ளனர். அவற்றில் சில:

அமெரிக்க அதிபர் ஜோ பைடன்: ”சிறந்த அரசியல் பார்வைக் கொண்ட நபர். அரியத் தலைவர். வித்தியாசமான எதிர்காலம் சாத்தியம் என்பதை காண்பிக்க தனது முழு வாழ்க்கையையும் அவர் பணயம் வைத்தார்.”

ஐ. நா. சபை பொதுச் செயலாளர் அண்டோனியா குத்தரெஸ்: ”வரலாற்றின் போக்கை மாற்றிய அன்பான தலைவர்களுள் ஒருவர். உலக நாடுகள் உயர்ந்த, உலகளாவிய தலைவரை இழந்துவிட்டது. அமைதிக்காக அயராது வாதிடுபவர். அவருடைய மறைவுக்கு எனது ஆழ்ந்த இரங்கலை தெரிவித்து கொள்கிறேன்.”

இந்திய பிரதமர் மோடி: “வரலாற்றில் அழியாத முத்திரையை பதித்த 20-ம் நூற்றாண்டின் முக்கியத் தலைவர்களில் ஒருவரான மிகைல் கோர்பசேவ் மறைவிற்காக அவரது குடும்பத்தாருக்கும், நண்பர்களுக்கும் எனது ஆழ்ந்த இரங்கல். இந்தியாவுடனான உறவை பேணுவதில் அவர் ஆற்றிய பங்களிப்பை இந்த நேரத்தில் நினைவுகூர்கிறோம்.”

ஐரோப்பிய ஒன்றிய தலைவர் உர்சுலா வான் டெர் லேயன்: “மிகைல் கோர்பசேவ் நம்பகமான மற்றும் மரியாதைக்குரிய தலைவராக இருந்தார். பனிப்போரை முடிவுக்கு கொண்டு வரவும் அவர் முக்கிய பங்கு வகித்தார். இதுவே சுதந்திர ஐரோப்பாவுக்கான வழியைத் திறந்தது. இவை எல்லாம் எங்களால் மறக்க முடியாத ஒன்று.”

பிரிட்டன் பிரதமர் போரிஸ் ஜான்சன்: “பனிப்போரை அமைதியான முடிவுக்கு கொண்டு வர அவர் காட்டிய தைரியமும், நேர்மையையும் எப்போதும் பாராட்டுக்குரியது.”

பிரான்ஸ் அதிபர் மக்ரோன்: “ஒரு அமைதியான மனிதர், அவரது தேர்வுகள் ரஷ்யர்களுக்கு சுதந்திரத்திற்கான வழியைத் திறந்தன.”

ரஷ்ய அதிபர் புதின்: “வரலாற்றில் பெரும் தாக்கத்தை ஏற்படுத்திய அரசியல் தலைவர் மிகைல் கோர்போசேவ். சிக்கலான பொருளாதார, சமூக சவால்கள் இருந்த காலக்கட்டத்தில் அவர் நம் நாட்டை வழி நடத்தினார். சீர்திருத்தங்கள் அவசியம் என்பதை அவர் ஆழமாகப் புரிந்து கொண்டிருந்தார். மனிதாபிமானம் சார்ந்து அவர் எடுத்து வந்த நடவடிக்கைகளை நான் ககவனித்து வந்திருக்கிறேன். அவரது மறைவுக்கு என் ஆழ்ந்த இறங்கலை தெரிவித்து கொள்கிறேன்.”



Read in source website

மாஸ்கோ: சோவியத் யூனியனின் கடைசி அதிபராக அறியப்பட்ட மிகைல் கோர்பசேவ் வயது முதிர்வுக் காரணமாக மரணம் அடைந்தார். அவருக்கு வயது 91.

1931-ஆம் ஆண்டு மார்ச் 2-ஆம் தேதி ரஷ்யாவின் பிரிவோல்னோயீல் பிறந்த மிகைல் கோர்பசேவ் தனது கிராமத்தில் நாஜிக்களின் ஊடுருவலை நேரில் கண்டதால் போரின் சாட்சியாக தனது சிறுவயது வாழ்க்கை மாறியதாக பலமுறை கூறியதுண்டு. தன்னுடைய 19 வயதில் சட்டம் பயில்வதற்காக மாஸ்கோ சென்ற இவர், கம்யூனிஸ்ட் கொள்கை மீது ஆர்வம் கொண்டு அக்கட்சியில் இணைந்து அரசியல் பணியாற்றத் தொடங்கினார். 1985-ஆம் ஆண்டு சோவியத்தின் கம்யூனிஸ்ட் கட்சியின் பொதுச் செயலாளராக தேர்ந்தெடுக்கப்பட்ட மிகைல் கோர்பசேவ், அதிபராக பதவியேற்றார்

அதிபராக... - மிகைலின் அரசியல் வாழ்வைப் பொறுத்தவரை அவர் சீர்திருத்தவாதியாகவே அறியப்படுகிறார். அவர் சோவியத் யூனியனை அரசியல் ரீதியாகவும், பொருளாதார ரீதியாகவும் சீர்திருத்த விரும்பினார். அமெரிக்காவுடன் அணு ஆயுத ஒப்பந்தம் செய்துகொண்டார். மேற்கு நாடுகளுடன் நட்புறவுக் கொண்டார். மிகைலின் இம்மாதிரியான நடவடிக்கைகளை ரஷ்யர்கள் விரும்பவில்லை. ரஷ்யாவின் சூப்பர் பவர் அங்கீகாரத்தை மிகைல் சிதைப்பதாகவும், அவரது சீர்திருத்த நடவடிக்கைகள் பெரும் குழப்பத்திற்கும் காரணமாக இருப்பதாக அவர்கள் நினைத்தனர்.

எல்லாவற்றையும்விட, சோவியத்தில் இணைந்திருந்த நாடுகளுக்கு குடியரசு உரிமை பெறுவதற்கான உரிமையை மிகைல் வழங்கினார். இதன் பொருட்டு சோவியத்தில் இருந்த உக்ரைன் உட்பட 15 நாடுகள் நாடுகள் சுதந்திரம் அடைந்தன. 1989-ஆம் ஆண்டு அமெரிக்க அதிபர் ஜார்ஜ் ஹெச்.டபிள்யூ.புஷ் உடன் செய்து கொண்ட ஒப்பந்தத்தின் காரணமாக பனிப்போர் முடிவுக்கு வர இவர் காரணமாக இருந்தார். இதன் காரணமாக மிகைல் கோர்பசேவுக்கு அமைதிக்கான நோபல் பரிசு விருது 1990-ஆம் ஆண்டு அளிக்கப்பட்டது.

தொடர் தடுமாற்றத்தை சந்தித்த மிகைல் கோர்பசேவ் ஆட்சி 1991-ஆம் ஆண்டு முடிவுக்கு வந்து, சோவியத் யூனியன் கலைக்கப்பட்டது. இதனைத் தொடர்ந்து தனது அதிபர் பதவியை அவர் ராஜினாமா செய்தார். போரிஸ் யெல்ட்சின் ரஷ்யாவின் அதிபராக பதவியேற்றார்.

புதினுக்கு நேரெதிர்... - மிகைல் கோர்பசேவ் தற்போது ரஷ்யாவின் அதிபராக உள்ள புதின் குணநலன்களிலிருந்து முற்றிலும் மாறுபாடு உடையவராக இருந்தார். மிகைல் பிற நாடுகள் மீதான படையெடுப்பைத் தவிர்த்தார். மாறாக, பேச்சுவார்த்தைகளை ஊக்குவித்தார்.

சமீபத்தில், உக்ரைன் மீதான ரஷ்யாவின் படையெடுப்பையும் மிகைல் விமர்சித்தார். உக்ரைன் படையெடுப்பு குறித்து அவர் வெளியிட்ட அறிக்கையில், “மனித உயிர்களை விட விலைமதிப்பற்றது எதுவும் உலகில் இல்லை. பரஸ்பர மரியாதை மற்றும் ஆர்வங்களின் அங்கீகாரத்தின் அடிப்படையில் பேச்சுவார்த்தைகளே மிகவும் கடுமையான முரண்பாடுகள் மற்றும் சிக்கல்களைத் தீர்ப்பதற்கான ஒரே சாத்தியமான வழி” என்றே தெரிவித்திருக்கிறார்.

இவ்வாறு தனது நாள் முழுவதும் அமைதியின் முகமாக அறியப்பட்ட சோவியத்தின் கடைசி அதிபரான மிகைல் கார்பச்சேவ் வயது முதிர்வுக் காரணமாக ஆகஸ்ட் 30-ஆம் தேதி மறைந்தார். அமைதியின் உண்மையான தலைவர் என்று அறியப்பட்ட மிகைல் கோர்பசேவ் தனது நாள் வாழ்நாள் முழுவதையும் சான்றாக்கி விடைபெற்று இருக்கிறார்.

பிரதமர் மோடியின் புகழஞ்சலி: “வரலாற்றில் அழியாத முத்திரையை பதித்த 20-ம் நூற்றாண்டின் முக்கியத் தலைவர்களில் ஒருவரான மிகைல் கோர்பசேவ் மறைவிற்காக அவரது குடும்பத்தாருக்கும், நண்பர்களுக்கும் எனது ஆழ்ந்த இரங்கல். இந்தியாவுடனான உறவை பேணுவதில் அவர் ஆற்றிய பங்களிப்பை இந்த நேரத்தில் நினைவுகூர்கிறோம்” என்று பிரதமர் மோடி தெரிவித்துள்ளார்.



Read in source website

நியூயார்க்: பாகிஸ்தானில் ஏற்பட்ட வரலாறு காணாத மழை வெள்ளத்தில் சிக்கி 30 லட்சம் குழந்தைகள் பாதிக்கப்பட்டுள்ளதாக ஐக்கிய நாடுகள் சிறுவர் நிதியம் (யுனிசெப்) தெரிவித்துள்ளது.

இது தொடர்பாக யுனிசெப் அமைப்பு அறிக்கை வெளியிட்டுள்ளது. அதன் விவரம் வருமாறு:

பாகிஸ்தானில் அண்மையில் வரலாறு காணாத மழை வெள்ளம் ஏற்பட்டது. இதனால் தண்ணீரால் பரவும் நோய்கள், வெள்ளத்தில் மூழ்கி உயிரிழப்பு, போதிய உணவின்றி ஊட்டச்சத்து குறைபாடு என பல்வேறு வழிகளிலும் குழந்தைகள் பாதிக்கப்பட்டுள்ளனர். அங்கு 30 லட்சம் குழந்தைகளாவது மனிதாபிமான அடிப்படையிலான உதவிகள் தேவைப்படும் சூழலில் உள்ளனர்.

பாகிஸ்தானில் கடந்த ஜூலையில் தொடங்கிய பருவமழையால் 3 கோடி பேர் பாதிக்கப்பட்டுள்ளனர். நாடு முழுவதும் 116 மாவட்டங்கள் பாதிப்புக்குள்ளாகியுள்ளன. அதில் 66 மாவட்டங்கள் மிக மோசமாக பாதிக்கப்பட்டுள்ளன. யுனிசெப் அரசு மற்றும் அரசு சாரா தன்னார்வ தொண்டு நிறுவனங்களுடன் இணைந்து குழந்தைகளின் அவசரத் தேவையைப் பூர்த்தி செய்ய நடவடிக்கைகள் மேற்கொண்டுள்ளது. கடந்த வாரம் பாகிஸ்தான் தேசிய நெருக்கடி நிலையை அறிவித்தது. கூடவே, உலக நாடுகளும், சர்வதேச அமைப்புகளும் தங்களுக்கு உதவி செய்யுமாறு வேண்டுகோள் விடுத்தது. இதன் அடிப்படையில் உதவிகள் மேற்கொள்ளப்பட்டு வருகின்றன.

350 குழந்தைகள் உயிரிழப்பு: பாகிஸ்தான் மழை வெள்ளத்திற்கு இதுவரை 350 குழந்தைகள் உள்பட 1100 பேர் உயிரிழந்திருக்கின்றனர். 1600க்கும் மேற்பட்டோர் காயமடைந்தனர். 2 லட்சத்து 87 ஆயிரம் வீடுகள் முற்றிலுமாக சேதமடைந்துள்ளன. 6 லட்சத்து 62 ஆயிரம் வீடுகள் பகுதியாக சேதமடைந்துள்ளன. பாகிஸ்தானின் மிக முக்கியமான ஆறுகளில் வெள்ளம் கரைகளை உடைத்துக் கொண்டு பாய்வதால் வீடுகள், விவசாய நிலங்கள், சாலைகள், பாலங்கள், பள்ளிகள், மருத்துவமனைகள் இன்னும்பிற முக்கிய கட்டுமானங்கள் சேதமடைந்துள்ளன.

மழை வெள்ளம் சூழ்ந்துள்ளதால் மக்கள் வயிற்றுப்போக்கு, சுவாசப் பாதை தொற்று, தோல் அரிப்பு இன்னும் பிற மாசடைந்த நீரால் ஏற்படும் நோய் பாதிப்புகள் ஏற்பட்டுள்ளன.பாதிக்கப்பட்டுள்ள மக்களில் 40 சதவீதம் குழந்தைகளாக உள்ளனர். வெள்ள நிலவரம் இன்னும் சில நாட்களில் மேலும் மோசமடையும் என்பதால் உலக சுகாதார நிறுவனம் பாதிக்கப்பட்ட பகுதிகளுக்கு சுகாதார சேவைகள் சென்று சேர்வதை உறுதி செய்ய வேண்டும் என்று வலியுறுத்தியுள்ளது. தொற்று நோய்ப் பரவலைக் கண்டறிந்து தடுக்க வேண்டும் என்றும் கூறியுள்ளது.

இவ்வாறு அந்த அறிக்கையில் தெரிவிக்கப்பட்டுள்ளது.



Read in source website

புதுடெல்லி: இந்தியாவில் ஆகஸ்ட் மாதத்தில் வசூலிக்கப்பட்ட மொத்த ஜிஎஸ்டி வருவாய் ரூ.1,43,612 கோடியாகும். இதில் மத்திய ஜிஎஸ்டி ரூ.24,710 கோடி, மாநில ஜிஎஸ்டி ரூ.30,951 கோடி, ஒருங்கிணைந்த ஜிஎஸ்டி (இறக்குமதி பொருட்கள் மூலம் வசூலிக்கப்பட்ட ரூ.42,067 கோடி உட்பட) ரூ.77,782 கோடி. இவைதவிர கூடுதல் வரி (செஸ்) ரூ.10,168 கோடி (இறக்குமதி பொருட்கள் மூலம் வசூலிக்கப்பட்ட ரூ.1,018 கோடி உட்பட) ஆகும்.

ஒருங்கிணைந்த ஜிஎஸ்டி-யிலிருந்து மத்திய ஜிஎஸ்டி-க்கு ரூ.29,524 கோடியையும், மாநில ஜிஎஸ்டி-க்கு ரூ.25,119 கோடியையும் அரசு வழங்கியுள்ளது. முறைப்படியான பைசலுக்கு பின், 2022 ஆகஸ்ட் மாதத்தில் மத்திய ஜிஎஸ்டி-க்கான வருவாய் ரூ.54,234 கோடியாகவும், மாநில ஜிஎஸ்டி-க்கான வருவாய் ரூ.56,070 கோடியாகவும் இருந்தது.

கடந்த ஆண்டு இதே மாதத்தில் ஜிஎஸ்டி வருவாய் ரூ.1,12,020 கோடி என இருந்த நிலையில், இந்த ஆண்டு வருவாயில் 28 சதவீதம் உயர்ந்துள்ளது. சென்ற ஆண்டு இதே காலத்தைவிட பொருட்கள் இறக்குமதி மூலமான வருவாய் 57 சதவீதமும் உள்நாட்டு பரிவர்த்தனை மூலமான வருவாய் (சேவைகள் இறக்குமதி உட்பட) 19 சதவீதமும் அதிகரித்துள்ளது.

தமிழ்நாட்டில், 2021 ஆகஸ்ட் மாதத்தில் 7,060 கோடியாக இருந்த ஜிஎஸ்டி வருவாய், 2022 ஆகஸ்ட் மாதத்தில் ரூ.8,386 கோடியாகி 19 சதவீத வளர்ச்சி கண்டுள்ளது. புதுச்சேரியில் 2021 ஆகஸ்ட் மாதத்தில் ரூ.156 கோடியாக இருந்த ஜிஎஸ்டி வருவாய், 2022 ஆகஸ்ட் மாதத்தில் ரூ.200 கோடியாகி 28 சதவீத வளர்ச்சி கண்டுள்ளது என்று மத்திய அரசின் செய்திக் குறிப்பு தெரிவிக்கிறது.



Read in source website

கடந்த வார இறுதியில் இருந்து தெற்கு கர்நாடகா மற்றும் கேரளாவின் சில பகுதிகளில் பெய்த கனமழை சாலைகளை வெள்ளத்தில் மூழ்கடித்து சேதத்தை ஏற்படுத்தியுள்ளது. இந்த இரண்டு மாநிலங்களிலும் ஏன் கனமழை பெய்து வருகிறது என்பதை இங்கே விளக்குகிறோம்.

மூன்று மாத தென்மேற்கு பருவமழைக் காலம் முடிவடைந்துவிட்டது. ஆனால், கேரளாவின் பருவமழை சமீபத்தில் சில நாட்களில் மட்டுமே ‘இயல்பு’ அளவை எட்டியது. இதற்கு நேர்மாறாக, பெங்களூரு மற்றும் தெற்கு கர்நாடகா மாவட்டங்கள் ஜூன் மாதத்தில் இருந்து பருவ மழைக் கண்டன. மழையின் அளவுகளில் பெரிய வேறுபாடுகள் இருந்தபோதிலும், கேரளா மற்றும் கர்நாடகா ஆகிய இரண்டு மாநிலங்களும் நிலச்சரிவு மற்றும் வெள்ளத்தில் மூழ்கிய சாலைகளால் பாதிக்கப்பட்டுள்ளன. பெங்களூரு-மைசூர் நெடுஞ்சாலை வெள்ளத்தில் மூழ்கியுள்ளது.

கேரளா மற்றும் கர்நாடகாவில் எவ்வளவு மழை பெய்தது?

தெற்கு கர்நாடகா மற்றும் கேரளாவின் சில பகுதிகளில் கடந்த வார இறுதியில் இருந்து கனமழை பெய்து வருகிறது. குறிப்பாக எர்ணாகுளம், பெங்களூரு மற்றும் வடக்கு கேரளாவில் உள்ள மாவட்டங்களில் தொடர்ச்சியான மழைப்பொழிவு பதிவாகியுள்ளது – சாலைகள் மற்றும் தாழ்வான பகுதிகள் வெள்ளத்தில் மூழ்கியுள்ளன. மேலும், வெள்ளம் சூழ்ந்த பகுதிகளில் சில பள்ளிகளை மூட வேண்டிய கட்டாயத்தில் உள்ளது.

கேரளாவில் உள்ள திருச்சூர், பாலக்காடு, காசர்கோடு மற்றும் எர்ணாகுளம் மாவட்டங்களில் உள்ள சில இடங்களில் புதன்கிழமை மாலையுடன் (ஆகஸ்ட் 31) முடிவடைந்த 24 மணி நேரத்தில் மிதமான மழை பொழிவு 100 மி.மீ-க்கு மிகாமல் பதிவாகியுள்ளது. கடந்த வாரம்தான் கேரளாவின் பருவ மழை, புதன்கிழமை நிலவரப்படி 1,512 மிமீ (-15 சதவீதம், ஆனால் சாதாரணமாகக் கருதப்படுகிறது) ‘இயல்பான’ அளவைத் தாண்டியுள்ளது.

சமீப காலமாக கர்நாடகாவில் தொடர் மழை பெய்து சேதத்தை சந்தித்து வருகிறது. இந்த ஆண்டு, கர்நாடகாவில் 894.7 மிமீ அல்லது 33 சதவீத மழை கூடுதலாக பதிவாகியுள்ளது. செவ்வாய்க்கிழமை, பெங்களூருவில் 24 மணி நேரத்தில் 93.7 மிமீ மழை பதிவானது. இது கடந்த பத்தாண்டில் அதிக அளவு மழைபொழிவு பதிவான இரண்டாவது ஆகஸ்ட் மாத நாளாக பதிவாகி உள்ளது.

கர்நாடகாவின் தெற்கு உள்பகுதியில் உள்ள மாவட்டங்களில், மாண்டியாவில் 296 மி.மீ அளவுக்கு அதிக அளவு மழை பெய்துள்ளது. இந்த மண்டலத்தில் உள்ள மூன்று மாவட்டங்களைத் தவிர, 13 மாவட்டங்களில் ஜூன் மாதத்தில் இருந்து குறிப்பிடத்தக்க மழைப்பொழிவு அதிகமாக உள்ளது. அவை: சாமராஜநகர் (179 மிமீ), தும்குரு (176 மிமீ), கோலார் (161 மிமீ), சித்ரதுர்கா (145 மிமீ), பெங்களூரு நகர்ப்புறம் (142 மிமீ), ராமநகரா (140 மிமீ), பெங்களூரு கிராமப்புறம் (125 மிமீ), சிக்பல்லாபுரா (119) மிமீ), தாவங்கரே (94 மிமீ) மற்றும் ஹாசன் (77 மிமீ) என மழை பொழிவு பதிவாகி உள்ளது.

கொடைக்கானல் டி.ஆர்.எம்.எஸ் (230 மிமீ), எர்ணாகுளம் தெற்கு (170 மிமீ), நேரியமங்கலம் (82.5 மிமீ), அதிரப்பள்ளி (72.5 மிமீ), தர்மஸ்தலா மற்றும் கண்ணூர் (70 மிமீ), உடும்பன்னூரில் (69 மிமீ), கட்லுவில் (67.5 மி.மீ.) ஆரளம் (66.5 மி.மீ.), வடவத்தூர் (63.5 மி.மீ.), பாபிளேஷ்வர் (60 மி.மீ.), கொல்லங்கோடு (49 மி.மீ.) ஆகிய இடங்களில் புதன்கிஅமை மிதமானது முதல் கனமழை வரை மழை பொழிவு பதிவாகியுள்ளது.

கடும் மழை பொழிவுக்கு என்ன காரணம்?

‘சினாப்டிக்’ அமைப்புகள் எதுவும் இல்லாத நிலையில், அதாவது குறைந்த காற்றழுத்த தாழ்வு மண்டலங்கள் அல்லது நாட்டில் பருவமழை காற்றழுத்த தாழ்வு மண்டலம் இல்லாத நிலையில், கேரளா, கர்நாடகா, தமிழ்நாடு, நாகாலாந்து, மணிப்பூர், மிசோரம், திரிபுரா, ஜம்மு காஷ்மீர் மற்றும் இமாச்சலப் பிரதேசம் ஆகிய மாநிலங்களில் இந்த வாரம் பரவலாக மழை பதிவாகியுள்ளன.

தற்போது பருவமழை முடிவடையும் நிலையில் உள்ளதால், பருவமழை சற்று குறைந்துள்ளது. ஆனால் இந்திய வானிலை ஆய்வு மையம் (IMD) புதன்கிழமை கேரளாவில் பருவமழை தீவிரமாகவும், கர்நாடகாவில் தீவிரமாகவும் இருந்தது என்று கூறியது. பருவமழை தாழ்வு நிலை – மழைப்பொழிவுக்கான முக்கிய பங்களிப்பு காரணியாக உள்ளதால் – இந்த மாநிலங்களில் மழைப்பொழிவுக்கு சாதகமாக உள்ளது.

ஜூலை மாத நடுப்பகுதியில் பருவமழை அமைப்பு நாடு முழுவதும் ஏற்பட்ட உடன் பருவமழை தாழ்வுநிலை அதன் இயல்பான நிலையில் இருந்து வடக்கு அல்லது தெற்கே 5 டிகிரி ஊசலாடியது. இந்த அலைவு பொதுவாக ஜூலை மற்றும் ஆகஸ்ட் மாதங்களில், இந்தியாவில் உச்ச பருவமழை மாதங்களாகப் பார்க்கப்படுகிறது. இந்த தாழ்வுநிலை அதன் இயல்பான நிலைக்கு தெற்கே அமைந்திருந்தால், இந்தியாவில் வலுவான பருவமழை பொழியும் என்று பார்க்கப்படுகிறது. இத்தகைய நிகழ்வில் இந்திய தீபகற்பத்தின் மத்திய மற்றும் வடக்குப் பகுதிகள் பயனடைகின்றன. இந்த தாழ்வுநிலை அதன் இயல்பான நிலையில் இருந்து வடக்கே மாறும்போது, இமயமலை அடிவாரத்திற்கு செல்லும் போது அல்லது இல்லாமல் இருக்கும்போது, இடையில் பருவமழை பொழியும் சூழல் உள்ளதாக அறிவிக்கப்படும். இந்த மழைப்பொழிவு பெரும்பாலும் தென் தீபகற்பத்திலும், கிழக்கு, வடகிழக்கு மற்றும் வட இந்தியாவிலும் மட்டுமே இருக்கும் இதுதான் மழைபொழிவு முறை.

மழைக்காலம் இவ்வாறு மழை பொழிவு, மழைபொழிவு நிற்பது காரணமாக ஈரமான மற்றும் வறண்ட வானிலைகளை உள்ளடக்கியதாக உள்ளது.

தாழ்வுப் பகுதியைத் தவிர, தென் தமிழகத்தில் ஒரு சூறாவளி சுழற்சி உள்ளது. அதில் இருந்து தெற்கு மத்தியப் பிரதேசம் வரை ஒரு தாழ்வுப் பகுதி செல்கிறது.

வானிலை முன்னறிவிப்பு என்ன சொல்கிறது?

புதன்கிழமை அன்று பதிவான சமீபத்திய செயற்கைக்கோள் படங்கள் கேரளா, தமிழ்நாடு, கர்நாடகா, தெலுங்கானா, உத்திரபிரதேசம், மேற்கு வங்க கங்கை பகுதி மற்றும் பீகார் ஆகிய இடங்களில் குறிப்பிடத்தக்க மேக மூட்டம் நிலவுவதைக் காட்டியது.

இந்திய வானிலை ஆய்வு மையம் வியாழக்கிழமை கேரளா மற்றும் தமிழகத்திற்கு ‘ஆரஞ்சு’ அலர்ட் எச்சரிக்கை விடுத்துள்ளது. செப்டம்பர் 4 வரை ‘மஞ்சள்’ அலர்ட் வெளியிட்டுள்ளது. கேரளா, மாஹே, தமிழ்நாடு ஆகிய பகுதிகளில் கனமழை முதல் மிக கனமான (24 மணி நேரத்தில் 64.5 மிமீ முதல் 204 மிமீ வரை) மழை பெய்யும் என்று தெரிவித்துள்ளது. காரைக்கால், புதுச்சேரி, மத்தியப் பிரதேசம், பீகார், அருணாச்சலப் பிரதேசம், அசாம், மேகாலயா, நாகாலாந்து, மணிப்பூர், மிசோரம், திரிபுரா, கோவா, கடலோர மற்றும் வடக்கு உள்துறை கர்நாடகா மற்றும் லட்சத்தீவுகள் ஞாயிற்றுக்கிழமை வரை கன மழை பெய்யும் என்று வானிலை ஆய்வு மையம் தெரிவித்துள்ளது. அடுத்த இரண்டு நாட்களுக்கு கேரள கடற்கரையில் பலத்த காற்று வீசக்கூடும் என்று எச்சரிக்கை விடுத்துள்ளது.

திங்கள்கிழமை (செப்டம்பர் 5), ஜம்மு காஷ்மீர், கில்கிட், பால்டிஸ்தான், லடாக், முசாபராபாத், இமாச்சலப் பிரதேசம், உத்தரகண்ட், கங்கைக்கரை மேற்கு வங்காளம் ஆகிய இடங்களில் கனமழை (24 மணி நேரத்தில் 64.5 மிமீ முதல் 115.4 மிமீ வரை) பொழியும் என்று ‘மஞ்சள்’ அலர்ட் விடுக்கப்பட்டுள்ளது.



Read in source website

நாட்டிலேயே மகாராஷ்டிரத்தில்தான் கடந்த ஆண்டில் அதிக அளவில் தற்கொலைகள் பதிவானதாக தேசிய குற்ற ஆவண காப்பகம் (என்சிஆர்பி) தெரிவித்துள்ளது. இந்தப் பட்டியலில் தமிழகம் 2-ஆம் இடத்திலும், மத்திய பிரதேசம் 3-ஆம் இடத்திலும் உள்ளன.
என்சிஆர்பி அறிக்கையின்படி, மகாராஷ்டிரத்தில் 22,207 (13.5%) தற்கொலைகள் பதிவாகியுள்ளன. இதற்கு அடுத்தபடியாக தமிழகத்தில் 18,925 (11.5%), மத்திய பிரதேசத்தில் 14,965 (9.1%), மேற்கு வங்கத்தில் 13,500 (8.2%), கர்நாடகத்தில் 13,056 (8%) தற்கொலைகளும் பதிவாகியுள்ளன. நாடு முழுவதும் கடந்த ஆண்டில் பதிவான ஒட்டுமொத்த தற்கொலை வீதத்தில், மேற்கண்ட 5 மாநிலங்களும் 50.4 சதவீதம் பங்கு வகிக்கின்றன.
மீதமுள்ள 49.6 % தற்கொலைகள் 23 மாநிலங்களிலும், 8 யூனியன் பிரதேசங்களிலும் பதிவாகியுள்ளன. நாட்டின் மொத்த மக்கள்தொகையில் 16.9 % ஐ உள்ளடக்கிய உத்தர பிரதேசத்தில், தற்கொலை வீதம் 3.6 % ஆகப் பதிவாகியுள்ளது.
யூனியன் பிரதேசங்களைப் பொறுத்தவரை, மக்கள்தொகை அதிகம் நிறைந்த தில்லியில் 2,840 தற்கொலைகள் பதிவாகியுள்ளன. அடுத்தபடியாக புதுச்சேரியில் 504 பேர் தற்கொலை செய்து கொண்டுள்ளனர்.
நாட்டின் ஒட்டுமொத்த தற்கொலைகளில் 33 %, படிப்பறிவிலும் பொருளாதாரத்திலும் முன்னேறிய மாநிலங்களாக கருதப்படும் மகாராஷ்டிரம், தமிழகம், கர்நாடகம் ஆகிய மாநிலங்களில் நிகழ்ந்திருப்பது அதிர்ச்சி அளிப்பதாக உள்ளது.
நாட்டில் கடந்த 2021-இல் 1,64,033 தற்கொலைகள் பதிவாகின. இது 2020-இல் (1,53,052) பதிவானதைக் காட்டிலும் 7.2 % அதிகமாகும். தமிழகத்தில் 10-ஆம் வகுப்பு, பிளஸ் 2 தேர்வு முடிவுகள் கடந்த ஜூன் மாதம் வெளியிடப்பட்டன. அதற்கு அடுத்த ஒரே நாளில் 11 மாணவ, மாணவிகள் தங்கள் இன்னுயிரை மாய்த்துக் கொண்டனர்.
இதே போன்று, ஆந்திர மாநிலத்தில் கடந்த ஏப்ரல் மாதம் நடைபெற்ற 10-ஆம் வகுப்புத் தேர்வை 6 லட்சம் பேர் எழுதினர். தேர்வு முடிவுகள் ஜூன் 3-ஆம் தேதி வெளியான நிலையில், 2 லட்சம் மாணவ, மாணவிகள் தோல்வியைத் தழுவினர். தமிழகத்தைப் போன்றே அங்கும் ஒரு சில நாள்களில் 8-க்கும் மேற்பட்டோர் தற்கொலை செய்துகொண்டுள்ளனர்.
படிப்பு தொடர்பாக பெற்றோர் தங்களின் விருப்பங்களைப் பிள்ளைகளின் மீது திணித்து மன ரீதியான அழுத்தத்தை ஏற்படுத்தக் கூடாது. நீட் தேர்வுக்கு முன்பும், பின்பும் மாணவர்கள் தற்கொலை செய்துகொள்வதன் பின்னால் பெற்றோர் ஏற்படுத்தும் மன ரீதியான அழுத்தம் முக்கிய பங்கு வகிக்கிறது. அதனால்தான் சென்னையில் கடந்த திங்கள்கிழமை (ஆகஸ்ட் 29) நடைபெற்ற திறன் மேம்பாட்டுப் பயிற்சி திட்ட தொடக்க விழாவில் முதல்வர் மு.க. ஸ்டாலின், பெற்றோர் தங்கள் ஆசைகளைப் பிள்ளைகள் மீது திணிக்கக் கூடாது என வலியுறுத்தியிருக்கிறார்.
குடும்பங்களில் ஏற்படும் தகராறு காரணமாக குழந்தைகளுடன் பெண்கள் தற்கொலை செய்துகொள்வதும் அண்மைக்காலமாக அதிகரித்து வருகிறது. இதற்கு பொருளாதார ரீதியான காரணங்கள் இருந்தாலும், ஆண்கள் மது அருந்திவிட்டு வந்து வீட்டில் தகராறில் ஈடுபடுவது மிக முக்கிய காரணமாக உள்ளதை பல செய்திகள் தெரிவிக்கின்றன.
தற்கொலை செய்துகொள்வது என்பது இந்தியாவில் மட்டும்தான் என்றல்ல, உலகம் முழுவதுமே பெரும் பிரச்னையாக உருவெடுத்துள்ளது. உலகில் 50 லட்சத்துக்கும் மேற்பட்ட மக்கள்தொகை கொண்ட 113 நாடுகளில் 89 நாடுகளில் கொலையைவிட தற்கொலைகள் அதிகமாக உள்ளன என்று ஓர் ஆய்வு தெரிவிக்கிறது.
உலகிலேயே அதிகபட்சமாக, ஜப்பானில்தான் கொலையைவிட தற்கொலை செய்துகொள்பவர்களின் எண்ணிக்கை 56.8 மடங்காக உள்ளது. அங்கு ஒரு லட்சம் பேருக்கு 14.2 பேர் தற்கொலை செய்துகொள்கின்றனர் என்றால், அதுவே 4 லட்சம் பேருக்கு ஒருவர் கொல்லப்படுகிறார். அமெரிக்காவில் ஒரு லட்சம் பேருக்கு 4.9 பேர் கொல்லப்படுகின்றனர் என்றால், 11.7 பேர் தற்கொலை செய்துகொள்கின்றனர்.
இந்தியாவைப் பொறுத்தவரை, ஒரு லட்சம் பேருக்கு 2.2 பேர் கொலை செய்யப்படுகின்றனர் என்றால், 11.3 பேர் தற்கொலை செய்துகொள்கின்றனர். இதிலும் படிப்பறிவிலும், பொருளாதாரத்திலும் முன்னேறிய மாநிலமாகக் கருதப்படும் கேரளம் (ஒரு லட்சம் பேருக்கு 24 பேர் தற்கொலை), தெலங்கானா (21.5), தமிழ்நாடு (22.2), மகாராஷ்டிரம் (16.1), கர்நாடகம் (18.4) ஆகிய மாநிலங்கள் முதல் 5 இடங்களில் உள்ளன.
பின்தங்கிய மாநிலங்களான பிகார் (0.7), உத்தர பிரதேசம் (2.1), ஜார்க்கண்ட் (5.6), கடந்த 30 ஆண்டுகளுக்கும் மேலாக வன்முறை, போராட்டம் ஆகியவையே வாடிக்கையான வாழ்க்கையாகி உள்ள ஜம்மு - காஷ்மீர் (2.2) போன்ற மாநிலங்களில் தற்கொலை விகிதம் குறைவாக உள்ளது என்பது வியப்பளிப்பதாகும்.
தொழில்சார்ந்த பிரச்னைகள், தனிமைப்படுத்தப்பட்ட உணர்வு, இழிவுபடுத்தப்படுதல், வன்முறை, குடும்ப பிரச்னை, மனநல பிரச்னை, மதுப் பழக்கத்துக்கு அடிமையாகுதல், நிதி இழப்பு, நாள்பட்ட நோய் போன்றவை தற்கொலைக்கு காரணங்களாகின்றன. பிரச்னைகளை மறக்க மது, போதைப் பொருள் போன்றவற்றை நாடினால் புதிய பிரச்னைகள்தான் உருவாகுமேயொழிய இருக்கும் பிரச்னை தீராது.
எந்த ஒரு பிரச்னைக்கும் தற்கொலை தீர்வல்ல என்பதை இளைஞர்கள் உள்பட சமுதாயத்தின் அனைத்துப் பிரிவினருக்கும் புரிய வைக்க வேண்டும்.



 



Read in source website

"மெல்லத் தமிழினிச் சாகும் அந்த மேற்கு மொழிகள் புவிமிசை ஓங்கும்' என்று எவனோ ஒருவன் கூறியதைக் கேட்ட மகாகவி பாரதியார் வெகுண்டெழுந்தார். "இந்த வசையெனக் கெய்திடலாமோ? சென்றிடுவீர் எட்டுத் திக்கும் கலைச்செல்வங்கள் யாவும் கொணர்ந்திங்கு சேர்ப்பீர்' என்று அறைகூவல் விடுத்தார்.
அன்று யாரோ ஒருவன் சொன்ன வார்த்தைகள் பாரதியாரை வேதனைப்படுத்தியது. இன்று, தமிழ்நாட்டில் தமிழ் எந்த நிலையில் இருக்கிறது என்பதை நினைக்கும்போது நமக்கும் அத்தகு வேதனை ஏற்படுவதைத் தவிர்க்க முடியவில்லை.
இக்கால இளைய தலைமுறையினர் தமிழ்மொழியை உணர்ச்சிபூர்வமாக அணுகுகின்றனரே தவிர, உணர்வு ரீதியாக அணுகவில்லை என்றே தோன்றுகிறது. செம்மொழி தமிழின் சிறப்புகளை வாட்ஸ்ஆப்பில் புகழ்ந்துதள்ளும்போதும், பிற மொழிகளை கற்றுக்கொள்ளுங்கள் என்று கூறுவோரை நிந்திக்கும்போதும் அவர்களின் தமிழ்ப் பற்று கிளர்ந்தெழுகிறது.
அதில் தவறு ஏதுமில்லை. ஆனால், நம்மவர்களே தமிழை தவறாகப் பேசும்போதும், தவறாக எழுதும்போதும் அதை திருத்தவேண்டும் என்ற எண்ணமோ, கடமை உணர்வோ பெரும்பாலானோருக்கு இருப்பதில்லை. போகிறபோக்கில் தமிழில் பற்பல தவறுகளை செய்துவிட்டு, அது குறித்த கவலையோ, குற்ற உணர்ச்சியோ சிறிதுமின்றி இருக்கின்றனர்.
கைப்பேசி அறிமுகமான புதிதில், அதில் தமிழ் மொழியில் கருத்துப் பரிமாற்றம் செய்வதற்கான வசதி இருக்கவில்லை. அதனால், ஆங்கிலம் தெரியாதவர்கள் தமிழ் வார்த்தைகளை அப்படியே ஆங்கிலத்தில் தட்டச்சு செய்து அனுப்பிவந்தனர். அது அவர்களுக்கு எளிதாக இருந்தது. இன்று தமிழில் தகவல் பரிமாற்றம் செய்வது எளிது. ஆயினும், சிலர் இன்றும் தமிழ் வார்த்தைகளை ஆங்கிலத்தில் தட்டச்சு செய்தே அனுப்புகின்றனர். இவர்களில் பலரும் பள்ளி, கல்லூரி மாணவர்களாக உள்ளனர்.
சில ஆண்டுகளுக்கு முன்னர், புகழ்பெற்ற தமிழ் எழுத்தாளர் ஒருவர், முன்னணி தமிழ் இதழ் ஒன்றில் ஒரு கட்டுரை எழுதியிருந்தார். தமிழ்மொழியில் எழுத்துகள் அதிகம் என்பதால், அவற்றைக் கற்றுக்கொள்வதும், தமிழில் எழுதுவதும், தமிழில் தட்டச்சு செய்வதும் சிரமமாக உள்ளது.
ஆனால், ஆங்கிலத்தில் குறைந்த எழுத்துகளே உள்ளன. எனவே, தமிழ் வார்த்தை உச்சரிப்புக்கு ஏற்ற ஆங்கில எழுத்துகளைப் பயன்படுத்தி, எழுதும் முறையை கொண்டு வரலாம் என்ற யோசனையை அவர் அக்கட்டுரையில் தெரிவித்திருந்தார்.
இதனால் அதிர்ச்சியடைந்த தமிழ் அறிஞர்கள், தமிழ் ஆர்வலர்கள், பொதுமக்கள் அந்த எழுத்தாளருக்கும், இதழுக்கும் தங்களுடைய கடும் எதிர்ப்பைத் தெரிவித்தனர்.
எனினும், இன்று ஒருவர் தமிழ் பேசத் தெரிந்தவராக இருந்து, தமிழை எழுதத் தெரியாதவராக இருந்தாலும் அவர் அது குறித்து கவலைகொள்ளத் தேவையில்லை என்ற நிலையை கணினி மென்பொருள்கள் ஏற்படுத்திவிட்டன.
தமிழில் பேசினாலே அதை தமிழ் எழுத்துருவாக மாற்றவும், தமிழ் வார்த்தைகளை ஆங்கில எழுத்துகளால் தட்டச்சு செய்தாலே, அவற்றை தமிழ் எழுத்துருவாக மாற்றவும் மென்பொருள்கள் வந்துவிட்டன. இதனால், குறைந்தபட்ச தமிழ் எழுதும் பழக்கமும் இன்றைய இளைய தலைமுறையினரிடம் மட்டுமின்றி, பொதுவாக தமிழர்களிடமே குறைந்துவருகிறது. இது வருங்காலத்தில் தமிழ் கற்றலிலும் தமிழ்ப் பயன்பாட்டிலும் மிக மோசமான விளைவுகளை ஏற்படுத்தும் என்பது உறுதி.
உதாரணமாக ஒன்று. அண்மையில் கள்ளக்குறிச்சி மாவட்டம், கனியாமூரில் அமைந்துள்ள தனியார் பள்ளியில் 12-ஆம் வகுப்பு படித்துவந்த மாணவி ஒருவர் மர்மமான முறையில் இறந்தது, நாடு முழுவதும் அதிர்வலைகளை ஏற்படுத்தியது. இது நடந்திருக்கக்கூடாத ஒரு சோக நிகழ்வு. அந்த மாணவி, தான் இறப்பதற்கு முன் எழுதிய கடிதம் ஒன்று பொதுவெளியில் பகிரப்பட்டது.
அவருடைய வாக்குமூலம் என்று கருதத்தக்க அக்கடிதம் தெளிவான கையெழுத்தில் ஆங்கிலத்தில் எழுதப்பட்டுள்ளது. கடிதத்தில் உள்ள எழுத்துகள் ஆங்கிலத்தில் எழுதப்பட்டிருந்தாலும் அந்த எழுத்துகள் தரும் உச்சரிப்பு பெரும்பாலும் தமிழ் வார்த்தைகளுக்கானவை.
இந்தக் கடிதம் குற்ற வழக்கில் ஒரு சாட்சியமாக மட்டுமே அனைவராலும் பார்க்கப்படுகிறது. ஆனால், அது இன்றைய மாணவர்களுக்கு ஆங்கிலம் எந்த அளவுக்குத் தெரிந்திருக்கிறது, தமிழ் எந்த அளவுக்குத் தெரிந்திருக்கிறது என்பதற்கான சாட்சியமாகவும் அக்கடிதம் இருக்கிறது.
முற்காலங்களில் கிராமப்புற, நகர்ப்புற பள்ளி, கல்லூரிகளில் தமிழ்வழி கல்வி மட்டுமே இருந்தது. ஆங்கிலம் ஒரு பாடமாக மட்டுமே இருக்கும். என்றாலும், அதை நன்றாக கற்றுக்கொண்டு வாழ்வில் வெற்றி கண்டவர்கள் நம் முந்தைய தலைமுறையினர்.
ஒரு சில கிராமப்புற பள்ளிகளில் மட்டும் மாணவர்களுக்கு முழுமையான ஆங்கிலம் கிடைக்காமல் இருந்தது. அவர்கள் மட்டும் உயர்கல்வியில் சிறிது தடுமாறுவார்கள். ஆனால், அவர்கள் தமிழில் நன்றாக எழுதப்படிக்கத் தெரிந்தவர்களாக இருந்தார்கள். இன்று நிலைமை மாறிவிட்டது.
இன்று பெரும்பாலான குழந்தைகள் மெட்ரிகுலேஷன் பள்ளி அல்லது சிபிஎஸ்இ பாடத்திட்ட பள்ளியில் சேர்க்கப்படுகின்றனர். அங்கெல்லாம் அவர்களுக்கு தமிழ் ஒரு மொழிப்பாடமாக மட்டுமே கற்பிக்கப்படுகிறது. மற்ற அனைத்துப் பாடங்களும் ஆங்கிலத்தில் இருப்பதால், அவர்கள் தமிழை முழுமையாகக் கற்றுக்கொள்ள வாய்ப்பு ஏற்படாமல் போகிறது.
அதே நேரத்தில், தாய்மொழி தமிழாகவோ, ஆங்கிலம் அல்லாத வேறு மொழியாகவோ இருக்கும் மாணவர்களுக்கு, ஆங்கிலத்தை முழுமையாக கற்றுக்கொள்ளும் வாய்ப்பும் இல்லாமல் போகிறது. இதனால், அந்த மாணவர்கள் தமிழையும் முழுமையாகக் கற்றுக்கொள்ளாமல், ஆங்கிலத்தையும் முழுமையாகக் கற்றுக்கொள்ளாமல் பெரிதும் அவதிப்படுகின்றனர்.
இவர்கள் ஏதேனும் ஒரு பட்டம் பெற்று ஒரு நிறுவனத்தில் பணிவாய்ப்பு பெறும்போது, முழுமையான மொழியறிவு இல்லாமல் தடுமாறும் நிலையை பல இடங்களில் கண்கூடாகக் காண முடிகிறது.
இது அந்த சில மாணவர்கள் மட்டும் எதிர்கொள்ளும் பிரச்னையல்ல; அடுத்த தலைமுறை தமிழறியாத தலைமுறையாக இருக்குமோ என்பதுதான் பிரச்னை. இந்த பிரச்னைக்கான தீர்வு என்ன?

 



Read in source website

இந்த ஆண்டின் தென்மேற்குப் பருவமழை தமிழகத்திற்கு சராசரியைவிட அதிக அளவில் கிடைத்திருப்பது விவசாயப் பணிகளுக்கு பெரும் உதவியாகும். மேலும், கர்நாடகத்தில் குறுகிய காலத்தில் கொட்டித்தீர்த்த மழையால் தமிழக விவசாயிகள் மகிழ்ச்சியில் உள்ளதைக் காணமுடிகிறது. இச்சூழல் ஏற்படக் காரணம் பருவ நிலையில் ஏற்பட்டுள்ள மாற்றமே ஆகும்.
சிலர் வெளிநாடு சென்று சிலகாலம் கழித்து தாய்நாடு திரும்பும்போது அவர்களுக்கும், மற்றவர்களுக்கும் பெருமகிழ்ச்சி ஏற்படுவது இயல்பு. அதுபோலவே, பல்லாயிரம் ஆண்டுகளாக தொடர்ந்து ஓடிவரும் காவிரி நீரினை சில நாள்கள் கரைபுரண்டோடக் காணும்போது மக்களிடையே பெருமகிழ்ச்சி ஏற்படுகிறது. அம்மகிழ்ச்சி காவிரி நீரைப்பயன்படுத்தி விவசாயம் செய்வதன் பயனாக வருவதோடு, மற்றவர்களின் உணவுத் தேவையை பூர்த்தி செய்வதாலும் வருவதாகும்.
தமிழகத்தில் காவிரியின் குறுக்கே, 1935-ஆம் ஆண்டு, மேட்டூரில் ஸ்டேன்லி நீர்த்தேக்கத்தை ஆங்கிலேயர்கள் உருவாக்கித் திறக்கும் வரை காவிரியில் ஏற்படும் தொடர் வெள்ளப்பெருக்கு ஆண்டுதோறும் காணக்கூடியதாகவே இருந்துள்ளது.
இவ்வெள்ளப்பெருக்கு நிலையிலும் இரண்டாயிரம் ஆண்டுகளுக்கு முன்பே, பண்டைய தொழில்நுட்பம் மூலம் கரிகால் சோழன் காவிரியில் கல்லணையை உருவாக்கி, விவசாயத்திற்கு காவிரி நீரை சிறப்புற பயன்படுத்தி, அவ்வணை இன்றளவும் நிலைத்திருக்கச் செய்துள்ள மதிநுட்பத்தை பொறியியல் அறிஞர்கள் இன்றும் வியந்து பாராட்டி வருகின்றனர்.
இப்படி ஆண்டுதோறும் கரைபுரண்டோடி, தன் கரையின் இருபுறமும் உள்ள மக்களுக்குத் தன்னையே வழங்கி அவர்களது வாழ்வை விவசாயம் மூலம் வளப்படுத்தி இறுதியாகக் கடலில் கலக்கும் காவிரியின் நிலை, இந்தியா சுதந்திரம் அடைந்ததற்குப்பின் படிப்படியாகக் குறைய ஆரம்பித்து விட்டது. குறிப்பாக, 1980-களுக்குப் பின் தமிழகத்திற்கு காவிரி நீர் போதிய அளவு கிடைப்பதில் சிக்கல்கள் உருவாகி வந்தன. இந்நிலை பிப்ரவரி 2013-இல் உச்சநீதிமன்றம் அளித்த காவிரி நீர் பங்கீட்டின் இறுதித் தீர்ப்பு வரும்வரை தொடர்ந்தது.
இப்படி நீர் பங்கீட்டில் பேரளவு சிக்கல்கள் எழ முதன்மைக் காரணம் மக்கள்தொகைப் பெருக்கமே. மகாகவி பாரதி 1920-களில் பாரதத்தைக் குறிப்பிடும்போது "முப்பது கோடி முகமுடையாள்' என்று வருணித்தார். இன்று 140 கோடி முகமாக ஒரே நூற்றாண்டில் பாரதத்தின் மக்கள்தொகை அதிகரித்து விட்டது.
இந்திய சுதந்திரத்திற்குப் பின், மாநிலங்கள் உருவாக்கப்பட்ட பொழுது, அதாவது 1960-களில் இந்தியாவின் அனைத்து மாநிலங்களிலும் சராசரி அளவு மக்கள்தொகையே இருந்தது. இருப்பினும், அம்மக்களுக்கே உணவு அளிக்க இயலாத நிலை ஏற்பட்டபொழுது நீர்ப்பாசன திட்டங்களை நிறைவேற்ற அன்றைய மத்திய அரசின் திட்டக்குழு விரைந்து செயல்பட்டது. அதன் விளைவாக 1965-இல் பசுமைப் புரட்சி உருவாக வழி ஏற்பட்டது.
1960-களில் எடுக்கப்பட்ட விரைவான திட்டங்களால் படிப்படியாக, பசுமைப் புரட்சிக்கு கை கொடுக்கும் வகையில், பல்வேறு ஆறுகளின் குறுக்கே பேரணைகள் கட்டப்பட்டு ஆற்றுநீர் பேரளவு தேக்கப்பட்டு, புதிய கால்வாய்கள் அமைக்கப்பட்டு, மானாவாரியாக இருந்த நிலங்கள் நீர்ப்பாசன நிலங்களாக மாற்றப்பட்டன. இதில் பெரும் பலன் அடைந்த மாநிலங்களில் கர்நாடகமும் ஒன்று.
ஏனெனில், 1960-களில் கர்நாடகத்தின் கால்வாய் பாசனப்பரப்பு ஏறத்தாழ இரண்டு லட்சம் ஹெக்டேர். இதுவே தற்போது 14 லட்சம் ஹெக்டேராக அதிகரித்துள்ளது. இதே காலத்தில் தமிழகத்தில் இக்கால்வாய் பாசனப்பரப்பு 8.8 லட்சம் ஹெக்டேராக இருந்தது தற்போது 6.5 லட்சம் ஹெக்டேராகக் குறைந்து விட்டது.
பல பத்து ஆண்டுகளாக, மிகவும் அனுபவமிக்க அமைச்சர் நீர்வளத்துறையில் இருந்தும் தமிழகத்திற்கு ஏன் இந்த நிலை? தமிழக நிலநீர் பாசனப்பரப்பு ஏன் தொடர்ந்து குறைந்து வருகிறது? காவிரித்தாய், புதிதாக கட்டப்படுகின்ற அணைகளான தடைக்கற்களை எல்லாம் தாண்டி பல நேரங்களில் கரைபுரண்டு ஓடுவதை இந்த ஆண்டும் நாம் கண்டு வருகிறோம்.
அரசியல்வாதிகள் வாக்குக் கேட்க வரும்பொழுது, தங்கள் ஆட்சி மிகச்சிறப்பாக இருந்தது, இம்முறை தாம் தேர்ந்தெடுக்கப்பட்டால் மீண்டும் அப்படியே சிறப்பான ஆட்சி நடைபெற்றும் என மார்தட்டிக் கொள்கின்றனர். ஆனால், உண்மைநிலை அதற்கு மாறாகவே உள்ளதை புள்ளிவிவரங்களும், காவிரியில் கரைபுரண்டு ஓடும் தண்ணீரும் காட்டுகின்றன.
தமிழகத்தை கடந்த 55-ஆண்டுகளாக திராவிட கட்சிகள் இரண்டு மட்டுமே மாறி மாறி ஆண்டு வருகின்றன. இருப்பினும் நிலநீர்ப்பாசன முன்னேற்றத்தில் அதுவும் கால்வாய், ஏரிப்பாசன அபிவிருத்தியில் குறிப்பிடும்படியாக எவ்வித முன்னேற்றமுமில்லை. அப்படியே ஓரளவு அதிகரிப்பு ஏற்பட்டுள்ளது என சுட்டிக்காட்டினாலும், அந்த அதிகரிப்பிற்கும் அதிகமான நிலம், அப்பாசனப் பரப்பிலிருந்து பல காரணங்களால் வெளியேறியுள்ளது. அக்காரணங்களில் பிரதானமாக விளங்குவது மற்ற உபயோகத்திற்கான நீர்ப்பாசன நிலப் பயன்பாடு.
உதாரணமாக, தமிழகத்தில் 1960-களின் பத்தாண்டு முதல் 2010-களின் பத்தாண்டு வரை கால்வாய் பாசனப்பரப்பு 8.83 லட்சம் ஹெக்டேரிலிருந்து 6.52 லட்சம் ஹெக்டேராகவும், ஏரிப் பாசனப்பரப்பு 9.12 லட்சம் ஹெக்டேரிலிருந்து 3.94 லட்சம் ஹெக்டேராகவும் குறைந்துவிட்டது. ஆனால், இவ்விரு நிலநீர்ப்பாசன ஆதாரங்களின் பதிவு செய்யப்பட்ட பாசனப்பரப்பு சற்றே அதிகம். அதாவது ஒவ்வொன்றும் பத்து லட்சம் ஹெக்டேராகும்.
இப்படிப்பட்ட சூழ்நிலையில், நீதிமன்றங்களோ, அரசியல்வாதிகளோ, அரசியல் கட்சிகளோ இயற்கையை வெல்ல முடியாது என்பதை நாம் கடந்த பல பத்து ஆண்டுகளாகப் பார்த்து வருகிறோம். மக்களுக்கும் சரியான பாடம் புகட்டவே இயற்கையும் அவ்வப்போது தன் போக்கை மாற்றி சிறிது விளையாடி வருகிறது. அதன் உதாரணமே இந்த ஆண்டும் அபரிமிதமாக காவிரியில் பெருகி வரும் வெள்ளப்பெருக்காகும்.
பிப்ரவரி 2013, உச்சநீதிமன்ற காவிரிநீர் பகிர்வு தீர்ப்பிற்குப்பின், தமிழகம் தனது பங்கிற்கு அதிகமாகவே ஐந்து ஆண்டுகள் (2013, 2014, 2018, 2019, 2022) காவிரியில் உபரியாக நீரைப்பெற்றுள்ளது குறிப்பிடத் தக்கது. இந்த ஆண்டுகள் அனைத்திலும் காவிரிநீரை முழுமையாகப் பயன்படுத்த இயலாமல் பேரளவு உபரிநீர் கடலில் கலந்துள்ளது.
அதே நேரத்தில், காவிரி வடிநிலத்தில், அகண்ட காவிரி என வர்ணிக்கப்படும் முசிறியில் இருந்து மூன்று கி.மீ. தொலைவிற்கு அப்பால் பல கி.மீ தூரம் வரை உள்ள வருவாய் கிராமங்கள் அனைத்தும், சகாரா பாலைவனத்தின் ஒரு பகுதியாக மழைப்பொழிவின்றி, மிகவும் வறண்டு கிடக்கும் நிலையை நாம் காண்கிறோம். ஆனால், இந்த வறண்ட கிராமங்கள் அனைத்தும் 1980-க்கு முன்பு வரை பொன்விளையும் பூமியாக இருந்து வந்ததைக் குறிப்பிட்டுக் கூறவேண்டும்.
உபரியான காவிரி நீரை நல்ல வாய்ப்புகள் இருந்தும் கர்நாடகமும் (புதிய மேக்கேதாட்டு அணை மூலம்) பயன்படுத்த இயலவில்லை (அதை தமிழகம் அனுமதிப்பதில்லை), தமிழகத்தாலும் பயன்படுத்திக்கொள்ள முடியவில்லை. ஆனால், ஒற்றுமையோடு செயல்பட்டால் இரண்டுமே சாத்தியமாகும். இனி வரும் காலங்களில் அதற்காகத் தமிழகமும் கர்நாடகமும் மத்திய அரசுடன் இணைந்து செயல்பட்டு குறிக்கோள்களை நிறைவேற்றிட கீழ்கண்ட இரு முயற்சிகளை எடுக்க வேண்டும்.
முதலாவது, கர்நாடகம் தற்போது தீவிரமாக பரிசீலித்து வரும் மேக்கேதாட்டு அணையினை கட்டி, உபரிநீர்வரத்து காலங்களில், அதில் நீரைத்தேக்க தமிழகம் ஒத்துழைக்க வேண்டும். ஆனால், காவிரிநீர்ப் பற்றாக்குறை காலங்களில் இப்புதிய அணையில் நீரை சேமிக்க அனுமதிக்கக்கூடாது. இரண்டாவது, தமிழகத்தில், மேட்டூர் அணை முதல் காவிரி கடலில் கலக்கும் இடம் வரை உள்ள ஏறத்தாழ 420 கி.மீ. தூரத்தில், மேட்டூர் அணையிலிருந்து முதல் 300-கி.மீ.இல் ஒவ்வொரு 50 கி.மீ.-க்கு ஒன்று வீதம் ஆறு பெரிய கதவணைகளை காவிரியின் குறுக்கே அமைக்க வேண்டும்.
காவிரியின் இருபுறமும் இந்த ஆறு கதவணைகள் மூலமாக ஒவ்வொரு பக்கமும் 40 முதல் 50 கி.மீ. தூரத்திற்கு கால்வாய் அமைத்து இவற்றின் மூலமாக காவிரிப் பாசனத்தை தற்போது கிடைக்கும் நீரினைக்கொண்டே மேலும் 2 லட்சம் முதல் 3 லட்சம் ஹெக்டேர் வரை தமிழகத்தில் அதிகரிக்க முடியும். இதனால், தற்போது பாலைவனம் போல் காட்சியளிக்கும் தமிழக தரிசு, மானாவாரி நிலங்களுக்கு ஒரு போக சாகுபடியாவது செய்வது உறுதியாகும்.
இரண்டாம் முயற்சிக்கு தற்போது தமிழகத்திலேயே சிறந்த உதாரணமாகத் திகழ்வது 1960-களின் முற்பகுதியில் அன்றைய முதல்வர் காமராஜரால் திறக்கப்பட்டு, இன்றளவும் செவ்வனே செயல்பட்டு வரும் பரம்பிக்குளம்-ஆழியாறு நீர்ப்பாசனத் திட்டமாகும். படிப்படியாக இத்திட்டம் சீரமைக்கப்பட்டு, தற்போது ஏறத்தாழ 2.5 லட்சம் ஹெக்டேர் மானாவாரி நிலங்களுக்கு பாசன வசதி அளிக்கிறது.
இந்த இரு செயல்கள் மேற்கொள்ளப்பட்டு, கர்நாடகமும், தமிழ்நாடும் விட்டுக்கொடுத்து செயல்பட்டால் பல்லாயிரக்கணக்கானோர் பொருளாதார முன்னேற்றம் பெற்று மகிழ்ச்சியடைவார்கள். தமிழக அரசே முக்கிய முடிவினை எடுத்து, பாதிக்கப்பட்ட காவிரிப்படுகையின் வறண்ட விவசாயிகளுக்கு உதவும் வகையில் தகுந்த நடவடிக்கைகளை மேற்கொண்டால், காவிரி நீர் வீணாவதைத் தடுப்பதோடு, விவசாயிகளின் வாழ்விலும் வளம் காண இயலும்.

கட்டுரையாளர்:
பேராசிரியர்.
 



Read in source website

நடப்பு 2022-23ம் நிதியாண்டின் ஏப்ரல் தொடங்கி ஜூன் வரையிலான முதலாவது காலாண்டில் மொத்த உள்நாட்டு உற்பத்தியின் (ஜிடிபி), வளர்ச்சி விகிதம் கடந்த நிதியாண்டின் முதலாவது காலாண்டுடன் ஒப்பிடுகையில் 13.5% ஆக அதிகரித்திருப்பது பொருளாதார வளர்ச்சியில் நம்பிக்கையளிக்கும் அறிகுறியாகப் பார்க்கப்படுகிறது.

கடந்த நிதியாண்டின் முதலாவது காலாண்டில் வளர்ச்சி விகிதம் 20.1% ஆக இருந்தது. எனினும், அப்போதைய வளர்ச்சி ரூ.32.46 லட்சம் கோடி என்ற அளவிலேயே இருந்தது. தற்போதைய வளர்ச்சி ரூ.36.85 லட்சம் கோடியை எட்டியுள்ளது. கடந்த நிதியாண்டின் கடைசிக் காலாண்டில் அதாவது, 2022 ஜனவரி தொடங்கி மார்ச் வரையிலான காலகட்டத்தில் வளர்ச்சி விகிதம் 4.1% ஆகச் சரிந்திருந்த நிலையில், இரட்டை இலக்கத்தில் அடியெடுத்து வைத்திருப்பது முக்கியமான ஒரு திருப்புமுனையாக இருக்கும் என்று மதிப்பிடப்படுகிறது.



Read in source website

30-01-2023      Monday

TNPSC Newspaper Archives

t