DINAMANI : Daily International and NAtional Media Aggregator for News and Information

TNPSC Current Affairs - 01-05-2022

 

இந்தியாவில் கடந்த 122 ஆண்டுகளில் இல்லாத அளவுக்கு ஏப்ரல் மாதத்தில் சராசரி வெப்பம் பதிவாகியுள்ளதாக இந்திய வானிலை ஆய்வு மையம் அறிவித்துள்ளது.

ஏப்ரல் மாதம் முழுக்க சராசரியாக 35.9 டிகிரி செல்சியஸ் முதல் 37.78 டிகிரி செல்சியஸ் வரையிலான வெப்பம் பதிவாகியுள்ளது. இது 122 ஆண்டுகளில் இல்லாத அளவுக்கு ஏப்ரல் மாதத்தில் பதிவான அதிகபடியான சராசரி வெப்பநிலை என்றும் குறிப்பிட்டுள்ளது.

கோடை காலம் தொடங்கியதன் விளைவாக கடந்த மார்ச் மாத தொடக்கம் முதலே குளிரின் அளவு குறைந்து வெப்பநிலை அதிகரிக்கத் தொடங்கியது. கோடை காலம் தொடங்கியதும், வெப்பநிலை தொடர்ந்து அதிகரித்து வந்தது.

நாடு முழுவதும் முக்கிய நகரங்களில் கடந்த வாரம் 45 டிகிரி செல்சியஸுக்கும் அதிகமாக வெப்பநிலை பதிவானது. ஹரியாணா மாநிலம், குருகிராமில் இதுவரை இல்லாத அளவில் 45.6 டிகிரி செல்சியஸ் வெப்பம் பதிவானது. இதற்கு முன்பு அதிகபட்சமாக கடந்த 1979, ஏப்ரல் 28-இல் 44.8 டிகிரி செல்சியஸ் வெப்பம் பதிவாகியிருந்தது.

இதேபோல், தில்லி, உத்தர பிரதேச மாநிலத்தின் பிரயாக்ராஜ், மத்திய பிரதேச மாநிலத்தின், கஜூராஹோ, நெளகாங், காா்கோன் நகரங்களிலும் அதிக அளவு வெப்பம் பதிவாகியுள்ளது. 

மகாராஷ்டிரத்தின் அகோலா, பிரம்மபுரி, ஜால்கோன், ஜாா்க்கண்ட் மாநிலம் தல்டோன்கஞ்ச் உள்ளிட்ட நகரங்களில் 45 டிகிரி செல்சியஸுக்கும் அதிகமாக வெப்பநிலை பதிவானது.

ராஜஸ்தான், மத்திய பிரதேசம், மகாராஷ்டிரத்தின் விதா்பா பகுதிகளில் அடுத்த 4 நாள்களுக்கு வெப்பத்தின் தாக்கம் அதிகமாக இருக்கும் என்று இந்திய வானிலை ஆய்வு மையம் அறிவித்துள்ளது.

மே மாதம் தொடங்கியுள்ள நிலையில், கடந்த ஏப்ரல் மாதத்தில் அதிகபடியான சராசரி வெப்பநிலை பதிவாகியுள்ளதாகவும் இந்திய வானிலை ஆய்வு மையம் குறிப்பிட்டுள்ளது.

இதுவரை இல்லாத அளவுக்கு 35.9 டிகிரி செல்சியஸ் முதல் 37.78 டிகிரி செல்சியஸ் வரை சராசரி வெப்பநிலை பதிவாகியுள்ளது. நாட்டின் வடமேற்குப் பகுதியில் கடந்த 2010ஆம் ஆண்டு 35.4 டிகிரி செல்சியஸ் சராசரி வெப்பநிலை பதிவானது. அதற்கு முன்பு 1973ஆம் ஆண்டு 37.75 டிகிரி செல்சியஸ் சராசரி வெப்பநிலை பதிவானது. 

காலநிலை மாற்றத்தின் எதிரொலியாக வெப்பத்தின் அளவு அதிகரித்து வருவதாக ஆராய்ச்சியாளர்கள் எச்சரித்து வருவது குறிப்பிடத்தக்கது.



Read in source website

சென்னை அடுத்த கல்பாக்கம் இந்திரா காந்தி அணு ஆராய்ச்சி மையத்தின் அமைப்பு தின விழா சனிக்கிழமை நடைபெற்றது.

அணுசக்தி ஆணையத்தின் தலைவராக இருந்த டாக்டா் விக்ரம் சாராபாயின் உத்தரவின்படி 1971 ஏப்ரல் 30-இல் அணு உலை ஆராய்ச்சி மையம் அமைக்கப்பட்டது. இது 1985-இல் இந்திரா காந்தி அணு ஆராய்ச்சி மையம் என பெயா் மாற்றம் செய்யப்பட்டது.

அணுசக்தி ஒழுங்குமுறை வாரியத்தின் தலைவா் ஜி. நாகேஸ்வரராவ் தலைமை வகித்து, அணுப்புரம் நகா்ப்பகுதியில் நிறுவப்பட்டுள்ள ஒருங்கிணைந்த கதிா்வீச்சு கண்காணிப்பு அமைப்பையும் தொடக்கிவைத்தாா்.

மேலும் அதிவேக ஈனுலை பரிசோதனை அணுஉலையின் பயணம்- மேலும் உச்சங்களுக்கு செல்லுதல் என்ற ஆவணத்தை நாகேஸ்வரராவ் வெளியிட, மையத்தின் முன்னாள் இயக்குனா் பி போஜே பெற்றுக் கொண்டாா்.

முனைவா் பட்டம், முதுநிலை பொறியியல், முதுநிலை தொழில்நுட்பம் ஆகியவற்றை நிறைவு செய்தவா்களுக்கு இந்தூரில் உள்ள நவீன தொழில்நுட்பத்திற்கான ராஜா ராமண்ணா மையத்தின் இயக்குனா் டாக்டா் சங்கா் வி. நாகே, சான்றிதழ்களை வழங்கினாா். “அணு ஆராய்ச்சி மையத்தை சோ்ந்த விஞ்ஞானிகள் எஸ். ரகுபதி, டாக்டா் பி. வெங்கட்ராமன், ஜி ஆா். பாலசுப்பிரமணியம், டாக்டா் டி .கே. சின்ஹா, டாக்டா் பி .ஆா். வாசுதேவராவ், கே. ஆா். சேதுராமன், உள்ளிட்டோா் கலந்து கொண்டனா்.



Read in source website

இந்தியாவில் முதல்முறையாக மொத்த ஜிஎஸ்டி வசூல் 1.5 லட்சம் கோடி ரூபையைத் தாண்டியுள்ளது. 

இது தொடா்பாக மத்திய நிதியமைச்சகம் வெளியிட்டுள்ள அறிக்கையில், 2022-ம் ஆண்டு ஏப்ரல் மாதத்தில் மொத்த ஜிஎஸ்டி வரி வருவாய் 1,67,540 கோடி ரூபாய். இதில் மத்திய ஜிஎஸ்டி வரியாக 33,159 கோடி ரூபாயும், மாநில ஜிஎஸ்டி வரியாக 41,793 கோடி ரூபாயும், ஒருங்கிணைந்த ஜிஎஸ்டி வரி 81,939 கோடி ரூபாயும் (இறக்குமதி செய்யப்பட்ட பொருட்கள் மூலம் 36,705 கோடி ரூபாயும், செஸ் வரியாக 10,649 கோடி ரூபாய் அடங்கும்.

2022-ம் ஆண்டு ஏப்ரல் மாதத்தில் மொத்த ஜிஎஸ்டி வசூல் முன்னெப்போதையும் விட அதிகமாகும். இது கடந்த மார்ச் மாதம் வசூலான ஜிஎஸ்டி தொகையான 1,42,095 ரூபாயை விட 25,000 கோடி ரூபாய் அதிகம். ஒருங்கிணைந்த ஜிஎஸ்டி வரியிலிருந்து மத்திய ஜிஎஸ்டிக்கு 33,423 கோடி ரூபாயும், மாநில ஜிஎஸ்டிக்கு 26,962 கோடி ரூபாயும் மத்திய அரசு விடுவித்துள்ளது.

2022-ம் ஆண்டு ஏப்ரல் மாதத்திற்கான வருவாய் கடந்த ஆண்டு இதே மாதத்தின் ஜிஎஸ்டி வருவாயை விட 20% அதிகமாகும். இந்த மாதத்தில், சரக்குகளின் இறக்குமதியின் வருவாய் 30% அதிகரித்துள்ளது. உள்நாட்டு பரிவர்த்தனையின் (சேவைகளின் இறக்குமதி உட்பட) வருவாய் கடந்த ஆண்டு இதே மாதத்தில் இருந்த வருவாயை விட 17% அதிகமாகும்

முதல் முறையாக மொத்த ஜிஎஸ்டி வசூல் 1.5 லட்சம் கோடி ரூபையைத் தாண்டியுள்ளது. 



Read in source website


புதுதில்லி: மருத்துவ உயர்கல்வி படிப்பிற்காக பாகிஸ்தான் செல்வதை தவிர்க்குமாறு தேசிய மருத்துவ ஆணையம் அறிவுறுத்தியுள்ளது.

சில நாள்களுக்கு முன்பு, இந்திய மாணவர்கள் பாகிஸ்தானில் உள்ள எந்தவொரு கல்லூரியிலும் அல்லது கல்வி நிறுவனங்களில் சேர வேண்டாம் என்று பல்கலைக்கழக மானியக் குழு (யுஜிசி) மற்றும் அகில இந்திய தொழில்நுட்பக் கல்வி கவுன்சில் (ஏஐசிடிஇ) வலியுறுத்திய நிலையில், தேசிய மருத்துவ ஆணையமும் தற்போது இந்தியாவிலேயே வேலை தேடுங்கள் அல்லது உயர் கல்வியைத் தொடருங்கள் என்ற எச்சரிக்கையை விடுத்துள்ளது.

இது குறித்து தேசிய மருத்துவ ஆணையம் வெளியிட்டுள்ள செய்தி குறிப்பில், “மருத்துவக் கல்வியைத் தொடர பாகிஸ்தானுக்குச் செல்ல வேண்டாம் என்று சம்பந்தப்பட்ட அனைவருக்கும் அறிவுறுத்தப்படுகிறது. 

பாகிஸ்தானில் உள்ள எந்தவொரு மருத்துவக் கல்லூரியில் எம்பிபிஎஸ், பிடிஎஸ் அல்லது அதற்கு இணையான மருத்துவப் படிப்பில் சேர விரும்பும் எந்தவொரு இந்திய நாட்டவரும், வெளிநாடு வாழ் இந்தியர்களும் பாகிஸ்தான் பல்கலைக்கழகங்களில் இருந்து பெற்ற கல்வித் தகுதிகளின் அடிப்படையில், இந்தியாவில் கல்வித் தகுதிகளின் அடிப்படையில் வெளிநாட்டு மருத்துவ பட்டதாரிகளுக்கான தேர்வை எழுதவோ அல்லது வேலை தேடவோ தகுதி பெற மாட்டார்கள்.

இருப்பினும், டிசம்பர் 2018 ஆண்டிற்கு முன்போ அல்லது அதற்குப் பிறகோ பாகிஸ்தானில் மருத்துவப் படிப்பில் சேர்க்கை பெற்ற மாணவர்கள், மத்திய உள்துறை அமைச்சகத்தின் பாதுகாப்பு அனுமதிக்கு பின் இந்தியாவில் பணி செய்ய தகுதியுடைவர்களாக கருதப்படுவர் என தெரிவிக்கப்பட்டுள்ளது. 

வெளிநாடுகளில் மருத்துவக் கல்வி பயின்ற இந்திய மாணவர்கள், அங்கு மருத்துவப் படிப்பை முடித்ததற்கான சான்றிதழ் பெற்ற பின்னர் இந்தியாவில் மருத்துவராக பதிவு செய்து மருத்துவம் பார்ப்பதற்கு, தணிக்கை பரிசோதனை தேர்வில் (எப்எம்ஜிஇ)  தகுதி பெற வேண்டும்.

“இந்த பொது அறிவிப்பு தொடர்பாக இந்திய அரசிடம் விளக்கம் கேட்டுள்ளோம். இந்தியாவின் இந்த வெளிப்படையான பாரபட்சமான மற்றும் விவரிக்க முடியாத நடவடிக்கைக்கு பதிலளிக்கும் வகையில் உரிய நடவடிக்கைகளை எடுக்க பாகிஸ்தானுக்கு உரிமை உள்ளது" என்று இஸ்லாமாபாத்தில் உள்ள பாகிஸ்தான் வெளியுறவு அமைச்சகம் ஒரு அறிக்கையில் தெரிவித்துள்ளது.



Read in source website


நாட்டின் வெளியுறவுத் துறை புதிய செயலராக மூத்த அதிகாரி வினய் மோகன் குவாத்ரா இன்று (ஞாயிற்றுக்கிழமை) பொறுப்பேற்றுக்கொண்டதாக மத்திய வெளியுறவுத் துறைச் செய்தித் தொடர்பாளர் அரிந்தம் பாக்சி தெரிவித்துள்ளார்.

1988-ம் ஆண்டு பிரிவு ஐஎஃப்எஸ் அதிகாரியான குவாத்ரா கடந்த ஜனவரி 2020 முதல் காத்மண்டுவில் தூதராக இருந்து வருகிறார். குவாத்ராவை வெளியுறவுத் துறை புதிய செயலராக கடந்த ஏப்ரல் 4-ம் தேதி மத்திய அரசு நியமித்தது. இவருடைய நியமனத்துக்கு அமைச்சரவை நியமனக் குழு ஒப்புதல் அளித்தது.

இதற்கு முன்பு வெளியுறவுத் துறை அமைச்சகம் மற்றும் பிரதமர் அலுவலகத்தில் இணைச் செயலராக குவாத்ரா இருந்துள்ளார்.



Read in source website

இலவச எரிவாயு இணைப்பு திட்டமான உஜ்வாலா தினம் மே 1 -ஆம் தேதி (ஞாயிற்றுக்கிழமை) நாடுமுழுக்க உள்ள 5,000 பஞ்சாயித்துக்களில் கொண்டாடப்படுகிறது. இந்த தினத்தில் அதிக இணைப்புகளை சோ்ப்பது உள்ளிட்ட பல்வேறு ஏற்பாடுகளை பொதுத்துறை எண்ணை நிறுவனங்கள் மேற்கொள்ள இருப்பதாக மத்திய பெட்ரோலியம் இயற்கை எரிவாயு அமைச்சகம் சனிக்கிழமை தெரிவித்துள்ளது.

வறுமைக் கோட்டுக்கு கீழ் உள்ள ஒவ்வொரு குடும்பத்துக்கும் இலவச எரிவாயு இணைப்பு வழங்கி சமூகத்தில் அனைவரையும் உள்ளடக்கிய வளா்ச்சியை காணும் நடவடிக்கையாக பிரதமரின் உஜ்வாலா திட்டம் உள்ளது. கடந்த 2016-ஆம் ஆண்டு மே 1-ஆம் தேதி உத்தரப்பிரதேசம் பல்லியாவில் இத்திட்டத்தை பிரதமா் மோடி தொடங்கி வைத்தாா். அதே மே 1- ஆம் தேதியை உஜ்வாலா தினமாக கொண்டாட மத்திய பெட்ரோலிய அமைச்சகம் முடிவு செய்துள்ளது. இதனையொட்டி, 5000-க்கும் மேற்பட்ட எல்பிஜி இணைப்புகளை பெற்ற பஞ்சாயத்துக்களில் உஜ்வாலா தினத்தை கொண்டாட எண்ணெய் நிறுவனங்கள் ஏற்பாடு செய்துள்ளன. இதில் எல்பிஜி இணைப்புகளை பெற்றவா்களின் அனுபவங்களைப் பகிா்ந்து கொள்வதுடன், எல்பிஜி-யை பாதுகாப்பாக பயன்படுத்துவது, முறையாக எரிவாயுவை சேமிப்பது, மேலும் எரிவாயு இணைப்புகள் இல்லாதவா்களுக்கு இணைப்புகளை வழங்குவது உள்ளிட்ட நோக்கங்களை அடிப்படையாகக் கொண்டும் இந்த நிகழ்ச்சி ஏற்பாடு செய்யப்பட்டுள்ளதாக மத்திய பெட்ரோலியம் இயற்கை எரிவாயு அமைச்சகம் தெரிவித்துள்ளது.

மேலும் ஏழை பயனாளிகளுக்கு பிரதமரின் உஜ்வாலா திட்டம் சரியான நேரத்தில் சென்றடையும் வகையில் பொதுத்துறை எண்ணெய் நிறுவனங்கள் மேற்கொண்டு வரும் முயற்சிகள் குறித்து மத்திய பெட்ரோலியம் மற்றும் இயற்கை வாயு துறை அமைச்சா் ஹா்தீப் சிங் பூரி, பாராட்டுக்களை தெரிவித்து, உஜ்வாலா பயனாளிகளுக்கும் அவா் வாழ்த்து தெரிவித்துள்ளாா்.

இந்த உஜ்வாலா தினத்தையொட்டி அஸ்ஸாம் மாநிலம் திப்ருகரில் நடைபெறும் உஜ்வாலா தினக் கொண்டாட்டங்களில் மத்திய பெட்ரோலியம் மற்றும் இயற்கை வாயு துறை இணையமைச்சா் ராமேஸ்வா் தெளி கலந்துகொண்டு புதிய இலவச எரிவாயு இணைப்புகளை பயனாளிகளுக்கு வழங்குகிறாா்.

 



Read in source website

செல்லிடப் பேசிகள், ஸ்மாா்ட் கடிகாரம், ஸ்மாா்ட் புகைப்படக்கருவி உள்ளிட்ட சில மின்னணு பொருள்கள் , உபகரணங்களுக்கு கட்டாய சோதனை (டெஸ்டிங்) மற்றும் தொலைத்தொடா்பு உபகரணங்களின் சான்றிதழ் பெறுவது போன்றவைகளிலிருந்து விலக்கு அளிக்கப்படுவதாக மத்திய தகவல் தொழில்நுட்பம் அமைச்சகம் சனிக்கிழமை தெரிவித்துள்ளது.

வணிகம் செய்வதை எளிதாக்கும் வகையில் கட்டாய சோதனைகளுக்கான ஒழுங்குமுறை விதிகள் தளா்த்தப்பட்டுள்ளதாக அமைச்சகம் சாா்பில் தெரிவிக்கப்பட்டுள்ளது.

மடிக்கணினிகள், வயா்லெஸ் விசைப்பலகைகள், ஸ்மாா்ட் கடிகாரம், கேமிராக்கள், விற்பனை முனைய இயந்திரங்கள்(பில்லிங் மெஷின்) உள்ளிட்ட பிற மின்னணு உபகரணங்கள் போன்றவைகள் 2012- ஆம் ஆண்டின் மின்னணு மற்றும் தகவல் தொழில்நுட்பம் (கட்டாயப் பதிவு) ஆணையின் கீழ் கட்டாயப் பதிவு செய்தல் வேண்டும். மத்திய மின்னணுவியல் மற்றும் தகவல் தொழில்நுட்ப அமைச்சகத்தின் கீழ் இது மேற்கொள்ளப்படுகிறது.

மேலும் 2017- ஆம் ஆண்டு இந்திய டெலிகிராஃப்ட் (திருத்தம்) விதிகளின் கீழ் தொலைத்தொடா்புக்கு பயன்படுத்தக்கூடிய சாதனங்கள் தகுதியானவை என்பதற்கான ‘கட்டாய சோதனை மற்றும் தொலைத்தொடா்பு உபகரணங்களின் சான்றிதழ்’ பெறவும் தொலைத்தொடா்புத் துறை கடந்த 2017 ஆம் ஆண்டு செப்டம்பா் 5 -ஆம் தேதி உத்தரவிட்டிருந்தது.

தற்போது, இவைகளில் மாற்றம் செய்யப்பட்டுள்ளதாக தொலைத்தொடா்பு வட்டாரங்களில் தெரிவிக்கப்பட்டுள்ளது.

‘தொழில்நுட்பம் அதிகரித்து வருவதால், ஸ்மாா்ட் கடிகாரம், ஸ்மாா்ட் புகைப்படக்கருவி போன்ற சில தயாரிப்புகள் தொடா்பான ஒழுங்குமுறைகள் ஒன்றுடன் ஒன்று கலந்துள்ளன. தொலைத்தொடா்புத் துறை மற்றும் மின்னணு மற்றும் தகவல் தொழில்நுட்பத் துறை அமைச்சகம் ஆகியவற்றின் அதிகார வரம்புகளை ஒன்று சோ்ப்பது தொடா்பாக தொழில் நிறுவனங்கள் கூட்டமைப்புகளிடமிருந்து கோரிக்கைகள் வந்தன. தொலைத்தொடா்புத் துறை மற்றும் மின்னணு மற்றும் தகவல் தொழில்நுட்பத் துறை அமைச்சகங்கள் இதுகுறித்து கலந்தாலோசித்து, இந்த உபகரணங்களுக்கான கட்டாய சோதனை, தொலைத்தொடா்பு உபகரணங்களின் தகுதி சான்றிதழ் போன்ற வரம்பிலிருந்து விலக்கு அளிக்க முடிவு செய்யப்பட்டுள்ளது’’ என மத்திய தொலைதொடா்புத் துறை சனிக்கிழமை வெளியிட்ட அறிப்பில் தெரிவித்துள்ளது.

இவ்வாறு விலக்கு பெற்ற உபகரணங்களில், செல்லிடப்பேசிகள், ஸ்மாா்ட் கடிகாரம், புகைப்படக் கருவிகள், சா்வா், மின்னணு விற்பனை இயந்திரங்கள் உள்ளிட்டவையாகும். நுகா்வோ் பரவலாகப் பயன்படுத்தும் இந்த தயாரிப்புகள் மீதான விதிவிலக்குகளால் தொழில்துறையினா் தங்கள் தயாரிப்புகளை விரைவாக வெளிக்கொண்டு வருவதற்கும் இது உதவுவதோடு இறக்குமதி தாமதங்களையும் குறைக்கும் எனவும் மத்திய தகவல் தொடா்புத் துறை தெரிவித்துள்ளது.

இந்த ஒழுங்குமுறை சீா்திருத்தம் மின்னணுவியல் உற்பத்தி நிறுவனங்களுக்கு வணிகம் செய்வதை எளிதாக்குவதுடன் பிரதமா் மோடியின் 1 டிரில்லியன் டாலா் டிஜிட்டல் பொருளாதாரமாக இந்தியாவை மாற்றுவதற்கான நோக்கத்திற்கும் இது பங்களிக்கும் எனவும் தெரிவித்துள்ளது.

இந்த விதி விலக்கு அரசிதழிலும் வெளியிடப்பட உள்ளது.

 



Read in source website

கரோனா பாதிப்பு தொடா்பாக சீனாவிடம் இருந்து உரிய பதில் கிடைத்தால் மட்டுமே ஹாங்ஷௌ ஆசியப் போட்டி 2022-இல் இந்தியா பங்கேற்பது குறித்து முடிவெடுக்கப்படும் என மத்திய விளையாட்டுத் துறை அமைச்சா் அனுராக் தாகுா் கூறியுள்ளாா்.

சீனாவின் ஹாங்ஷௌ நகரில் வரும் செப்டம்பா் 10 முதல் 25 வரை ஆசியப் போட்டிகள் (ஏஷியாட்) நடைபெறவுள்ளன. இதற்கிடையே சீனாவில் தற்போது கரோனா பாதிப்பு அதிகரித்து உள்ளது. பெரிய நகரான ஷாங்காயில் தீவிரமாக கட்டுப்பாடுகள் விதிக்கப்பட்டுள்ளன. இதனால் ஹாங்ஷௌ ஆசியப் போட்டிகள் ஒத்திவைக்கப்படலாம் என தகவல்கள் வெளியாகி உள்ளன.

இதுதொடா்பாக மத்திய அமைச்சா் அனுராக் தாகுா் கூறியதாவது: போட்டியை நடத்தும் சீனாவிடம் இருந்து உரிய தகவல் கிடைக்க வேண்டும். அதுதான் முக்கியம். பங்கேற்கும் அனைத்து நாடுகளும் இதுகுறித்து ஆலோசித்து வருகின்றன. சீனாவிடம் இருந்து தெளிவான பதில் கிடைத்தால் இந்திய அணிகள் பங்கேற்பது குறித்து முடிவு செய்யப்படும் என்றாா் அனுராக்.

 



Read in source website

திருநெல்வேலி: திருநெல்வேலி மாவட்டம் கூடங்குளத்தில் தலா ஆயிரம் மெகாவாட் மின் உற்பத்தி திறனுள்ள 2 அணு உலைகளில் மின் உற்பத்தி நடைபெற்று வருகிறது.

ரூ.39,747 கோடி மதிப்பீட்டில் 3 மற்றும் 4-வது அணு உலைகள் அமைப்பதற்கான கட்டுமானப் பணிகள் 2017 ஜூனில் தொடங்கின. தற்போதுவரை 65 சதவீதப் பணிகள் நிறைவடைந்துள்ளன. வரும் 2023 மார்ச்சில் கட்டுமானப் பணிகளை முடித்து, மின்உற்பத்தி தொடங்க வாய்ப்புள்ளதாக தெரிவிக்கப்பட்டது. கடந்த 2 ஆண்டுகளாக கரோனா கட்டுப்பாடுகளால் இப்பணிகளில் தொய்வு ஏற்பட்டது.

இந்நிலையில், 3-வது அணுஉலைக்கான 322 டன் எடையுள்ள அழுத்தக்கலன் நேற்று வெற்றிகரமாக நிறுவப்பட்டது. அணுமின்உற்பத்தியின்போது வெளியாகும்அணுக்கழிவுகள் இந்த அழுத்தக்கலனில்தான் முதலில் சேகரிக்கப்படும். கதிரியக்கம் வெளியாகாத அளவுக்கு இந்த அழுத்தக்கலன் வடிவமைக்கப்பட்டுள்ளது.

அழுத்தக் கலனை நிறுவும் பணிகளை, இந்திய அணுசக்தி கழகத் தலைவர் மற்றும் நிர்வாக இயக்குநர் புவன் சந்திரபதக் கொடிஅசைத்து தொடங்கி வைத்தார். இயக்குநர் (நிதி) எம்.சங்கரநாராயணன், செயல் இயக்குநர் எஸ்.ஜெயகிருஷ்ணன், அணுமின் நிலைய வளாக இயக்குநர் ராஜீவ் மனோகர் காட்போலே, அணுஉலை திட்ட இயக்குநர்கள் சின்னவீரன், சுரேஷ்,1, 2-வது அணுஉலை நிலையஇயக்குநர் ஆர்.எஸ்.சவான் உள்ளிட்டோர் உடனிருந்தனர்.

5 மற்றும் 6-வது அணு உலைகளுக்கான கட்டுமானப் பணிகள் ரூ.49,621 கோடி மதிப்பீட்டில் கடந்தஆண்டு ஜூன் மாதம் தொடங்கின. தற்போது, 10 சதவீதப் பணிகள் நிறைவடைந்துள்ளன. 5-வது அணு உலையில் இருந்து 2026-ல் உற்பத்தி தொடங்க திட்டமிடப்பட்டுஇருந்த நிலையில், உக்ரைன் மீதான போர் காரணமாக, ரஷ்யாவில்இருந்து உபகரணங்கள் வருவது தடைபட்டுள்ளது. இதனால், 3, 4, 5 மற்றும் 6-வது அணு உலைகளின் பணிகள் திட்டமிட்ட காலத்துக்குள் முடிவடையாது என தெரிகிறது.



Read in source website

மூணாறில் இன்று முதல் மலர் கண்காட்சி தொடங்க உள்ளது.

கேரள மாநிலம் மூணாறில் ஆண்டுதோறும் மலர் கண்காட்சி நடத்தப்படுவது வழக்கம். இந்த ஆண்டுக்கான நிகழ்ச்சி மூணாறு பொட்டானிக்கல் கார்டனில் இன்று தொடங்க உள்ளது.

தேவிகுளம் எம்எல்ஏ எ.ராஜா தலைமையில், கேரள அமைச்சர் முகம்மது ரியாஸ் தொடங்கி வைக்கிறார். தினமும் மாலை நாட்டுப்புற பாடல்கள், பாரம்பரிய நடனம் உள்ளிட்டவை நடைபெற உள்ளன.

வரும் 10-ம் தேதி வரை தினமும் காலை 10 முதல் இரவு 9 மணி வரை மலர் கண்காட்சி நடைபெறும். கட்டணம் பெரியவர்களுக்கு ரூ.50, குழந்தைகளுக்கு ரூ.30. இதற்கான ஏற்பாடுகளை மாவட்ட சுற்றுலா மேம்பாட்டுக் குழு செய்துள்ளது.



Read in source website

லண்டன்: ரஷ்யா - உக்ரைன் இடையிலான போர் 2 மாதங்களுக்கும் மேலாக நீடித்து வருகிறது. ரஷ்யாவின் தாக்குதலில் உக்ரைன் நாட்டின்பல்வேறு நகரங்கள் உருக்குலைந்துள்ளன. என்றாலும் ரஷ்ய படைகளுக்கு உக்ரைன் ராணுவம் கடுமையான பதிலடி கொடுத்து வரு கிறது.

இந்நிலையில் போரின் முதல்நாளிலேயே ரஷ்யாவின் 10 விமானங்களை உக்ரைன் விமானி ஒருவர் சுட்டு வீழ்த்தினார். இதனால் உலகம் முழுவதும் பிரபலமான அந்த விமானி ‘கோஸ்ட் ஆஃப் கீவ்’ (கீவ் நகரின் பேய்) என அழைக்கப்பட்டார்.

தொடர்ந்து போரில் மிகவும் தீவிரமாகவும் திறமையாகவும் செயல்பட்ட அந்த விமானியை ‘கோஸ்ட் ஆப் கீவ்’ என்றே உக்ரைன்அடையாளப்படுத்தி வந்தது. ஆனால் ‘கோஸ்ட் ஆஃப் கீவ்’ என்று யாருமில்லை. தங்கள் வீரர்களை உற்சாகப்படுத்தவே இப்படி ஒருகற்பனை கதாபாத்திரத்தை உக்ரைன் உருவாக்கியுள்ளது என விமர்சனமும் எழுந்தது.

இந்நிலையில் ‘கோஸ்ட் ஆப் கீவ்’ என அறியப்பட்ட அந்த விமானிகடந்த மாதம் நடந்த போரில் வீரமரணம் அடைந்தாக ‘டைம்ஸ் ஆப் லண்டன்’ இதழ் தெரிவித்துள்ளது.

துணிச்சல் மிகுந்த அந்த விமானியின் பெயர் ஸ்டெபான் தரபால்கா (29) எனவும், ஒரு குழந்தைக்கு தந்தை எனவும் உக்ரைன் அதிகாரிகள் கூறியதாக அந்த இதழ் தெரி விக்கிறது.

கடந்த மார்ச் 13-ம் தேதி ரஷ்யபோர் விமானங்களை எதிர்கொள்வதற்காக மிக்-29 ரக விமானத்தில் தனி ஆளாக ஸ்டெபான் சென்றுள்ளார். இதில் ரஷ்யாவின் 40 ஜெட்விமானங்களை அவர் சுட்டு வீழ்த்திரஷ்யப் படைகளை திணற அடித்துள்ளார். இறுதியில் ஸ்டெபான் விமானம் சுட்டு வீழ்த்தப்பட்டதில் அவர் வீரமரணம் அடைந்தார்.

அவருக்கு உக்ரைன் ராணுவத்தின் மிக உயரிய விருதை அந்நாட்டு அரசு வழங்கி கவுரவித்துள்ளது. மேலும் உக்ரைன் கதாநாயகன் என்ற பட்டமும் ஸ்டெபானுக்கு வழங்கப்பட்டுள்ளது.

மேற்கு உக்ரைனில் உள்ள ஒரு சிறிய கிராமத்தில் சாதாரண குடும்பத்தில் பிறந்த ஸ்டெபான், இளம் வயதிலேயே விமானியாக வேண்டும் என்ற லட்சியம் கொண்டிருந்தார். இவ்வாறு டைம்ஸ் ஆஃப் லண்டன் இதழ் கூறியுள்ளது



Read in source website

ருட்கர் பிரெக்மன். ‘புதிய சிந்தனைகளைக் கொண்ட இளம் டச்சு மேதை’ என்று ‘தி கார்டியன்’ நாளிதழால் புகழப்பட்டவர். 33 வயதாகும் பிரெக்மனின் சமீபத்திய புத்தகமான ‘Humankind: A Hopeful History’ உலகெங்கும் சலசலப்பை ஏற்படுத்திவருகிறது. ‘மனிதகுலத்தை முற்றிலும் புதியதொரு கண்ணோட்டத்தில் பார்க்க இந்நூல் என்னைத் தூண்டியது’ என்று யுவால் நோவா ஹராரி இந்த நூலைப் பற்றிக் குறிப்பிட்டிருக்கிறார். அறிவியல் ஆய்வுகள், வரலாற்று நூல்கள் பலவும் மனிதர்களை அடிப்படையிலேயே சுயநலமானவர்கள், தீய இயல்பைக் கொண்டவர்கள் என்று கூறியிருக்கும் நிலையில் அந்தக் கருத்தாக்கங்களையெல்லாம் இந்தப் புத்தகத்தின் மூலம் ருட்கர் பிரெக்மன் தகர்த்து, மனித குலத்தைப் பற்றி நம்பிக்கையூட்டும் ஒரு பார்வையை வைத்திருக்கிறார். நவீன அரசுகள், பொருளாதாரம், நிறுவனங்கள், சிறை அமைப்புகள் போன்றவை இயங்குவதற்கான சிறந்த முன்மாதிரிகளையும் அவர் இந்த நூலில் முன்வைக்கிறார். இந்தப் புத்தகத்தை நாகலட்சுமி சண்முகம் தமிழில் மொழிபெயர்த்திருக்கிறார். ருட்கர் பிரெக்மனுடன் ஜூம் சந்திப்பு வழியாக நடத்திய உரையாடலிலிருந்து சில பகுதிகள்...



Read in source website

30-01-2023      Monday

TNPSC Newspaper Archives

t